Адзіная дзяўчына-трактарыст удзельнічае ў пасяўной у Талачынскім раёне
Навучэнка трэцяга курса Коханаўскага дзяржаўнага ліцэя сельскагаспадарчай вытворчасці Марыя Грушэцкая праходзіць практыку на сяўбе ў сельгаспрадпрыемстве «Камсамольская праўда» Талачынскага раёна.
Дзяўчыне даверылі «Беларус-82» з раскідвальнікам мінеральных угнаенняў.
– З дзяцінства люблю тэхніку, – гаворыць Марыя. – Марыла навучыцца вадзіць трактар і аўтамабіль, як бацька і брат. Мне падабаецца вучыцца ў ліцэі, удзячна выкладчыкам і майстрам за атрыманыя веды.
Дзяўчына з задавальненнем выконвае сваю працу, робячы пасільны ўнёсак у закладку будучага ўраджаю. У далейшым Марыя Грушэцкая хоча атрымаць вышэйшую адукацыю і стаць аграномам.
Дарэчы, летась яна працавала тут памочнікам камбайнера ў брата. За час жніва ні разу не паскардзілася на стомленасць. Наадварот, першай прыбягала на машынны двор, каб праверыць гатоўнасць агрэгата да выхаду ў поле.