Аграрыі Віцебшчыны першымі ў краіне апрабуюць эксперыментальную мадэль трактароў «Беларус»

Механізатары Віцебшчыны першымі ў краіне змогуць ацаніць эксперыментальную мадэль трактароў «Беларус-3522» з рухавіком «Caterpillar», якія пройдуць эксплуатацыйную праверку ва ўмовах рызыкоўнага земляробства паўночнага рэгіёна. Урачыстая цырымонія перадачы сертыфікатаў на тэхніку адбылася 23 чэрвеня на ААТ «Мінскі трактарны завод» – такая шырокамаштабная акцыя арганізавана ўпершыню ў Беларусі.

Гэта падзея стала вынікам сумеснай праекта аблвыканкама і машынабудаўнічага гіганта па стварэнні высокапрадукцыйнай тэхнікі, здольнай вырашыць галоўную праблему аграрыяў рэгіёна – аптымізаваць тэрміны правядзення асноўных палявых работ для павышэння прадукцыйнасці раслінаводства. Стартаваў праект каля 2 гадоў таму. Як адзначыў старшыня аблвыканкама Мікалай Шарснёў, Віцебшчына востра мае патрэбу ў высокапрадукцыйнай тэхніцы для дасягнення агульнага поспеху ў сельскай гаспадарцы.

– У нас самы кароткі вегетацыйны перыяд, за кошт скарачэння часу правядзення работ мы здольны павялічыць ураджай і ў выніку паменшыць сабекошт канчатковай прадукцыі, – падкрэсліў падчас цырымоніі кіраўнік вобласці. – Акрамя таго, з'яўленне сучаснай, энергонасычанай, якаснай тэхнікі з'яўляецца важным фактарам прыцягнення моладзі да працы на зямлі. Апроч камфортных умоў эксплуатацыі, на такіх трактарах магутнасцю 355 конскіх сіл можна дасягаць высокіх вытворчых вынікаў, а значыць, і добра зарабляць.

Будучыня за такой тэхнікай, і яна становіцца бліжэй дзякуючы сумесным намаганням аграрыяў Віцебшчыны і мінскіх машынабудаўнікоў. Мікалай Шарснёў заклікаў спецыялістаў МТЗ не спыняцца на дасягнутым

– паўночны рэгіён ужо з нецярпеннем чакае трактароў на 450 – 500 л. з.

Па словах генеральнага дырэктара МТЗ Фёдара Даматэнкі, сумесны з аблвыканкамам праект на 1-м этапе ўпершыню прадугледжваў стварэнне не адзінкавага ўзору, а мабільнай групы трактароў «Беларус-3522» на базе амерыканскага рухавіка, які, дарэчы, мае тэрмін гарантыі 10 гадоў. Пры гэтым ён падкрэсліў, што машыны не перадаюцца, а прадаюцца на льготных умовах, авансавыя плацяжы ўжо атрыманы. Разам з тым вытворца бязвыплатна акажа дапамогу механізатарам у асваенні навінкі і гатовы прадаставіць сэрвіснае суправаджэнне.

Наступная партыя «Беларус-3522» адправіцца таксама на Віцебшчыну восенню бягучага года. Другім гэтак жа маштабным мерапрыемствам у рамках праекта стане стварэнне і эксплуатацыйная праверка трактароў на камбінаваным (газ плюс салярка) паліве ў рэгіёне.

Адказная місія стаць выпрабавальным палігонам для навінак выпала гаспадаркам, арганізацыйна якія ўваходзяць у Аршанскую і Віцебскую кааперацыйна-інтэграваныя структуры. Па словах Мікалая Шарснёва, менавіта такім аб'яднанням па сілах не толькі набыць магутныя агрэгаты, але і максімальна загрузіць іх, а значыць, і акупляць інвестыцыі ў тэхпераўзбраенне.

Пад гукі фанфар механізатары сельгаспрадпрыемстваў атрымалі ключы ад трактароў, а таксама напутствие на паспяховую працу ад Мікалая Шарснёва і Фёдара Даматэнкі.

Адзін з трактароў адправіўся ў СВФ «Браздзечына» Аршанскага мясакамбіната. Яго дырэктар Юрый Капітанаў упэўнены ў сваіх спецыялістах, якія прайшлі навучанне на новай машыне і гатовыя паказваць годныя вытворчыя вынікі.

– У нас адна праблема – надвор'е, таму пастаянна працуем над скарачэннем тэрмінаў асноўных работ. А з такой магутнай тэхнікай гэта будзе зрабіць значна лягчэй,тем больш, што ў гаспадарцы контурнасць палёў ад 35 га да 350 га, сярэдні бал воранаў на ўзроўні 35, – растлумачыў Юрый Капітанаў. – Таму упэўнены, што гэта добрае ўкладанне сродкаў, прытым на льготных умовах.

Урачыстасць цырымоніі надавалі не толькі прысутнасць высокапастаўленых моцных асобаў і топ-менеджараў вядучых айчынных машынабудаўнічых кампаній, але і запальнае выступленне калектыву мастацкай самадзейнасці РУП «Віцебскаблгаз», чыё майстэрства стала своеасаблівым падарункам ад Віцебшчыны спецыялістам Мінскага трактарнага завода.

– Мерапрыемства, удзельнікамі якога мы сталі, магчыма, пакладзе пачатак добрай, але падзабытай традыцыі яднання сілаў і накіраванасці аграрыяў і прамыслоўцаў на шляху вырашэння агульных праблем, вынікам чаго стане тое, на што нацэлівае нас Прэзідэнт краіны, – нарошчванне аб'ёмаў вытворчасці прадукцыі і зніжэнне яе сабекошту, - падкрэсліў кіраўнік вобласці.

Каментарый генеральнага канструктара ААТ «МТЗ» Андрэя Стасілевіча: «Мабільны атрад на «Беларус-3522» створаны спецыяльна для праверкі апошніх тэхнічных рашэнняў завода. Акрамя рухавіка «Caterpillar» з павышанай магутнасцю і цягавітасцю тут прадугледжана магчымасць здвойвання пярэдніх і задніх колаў, устаноўлены узмацненая трансмісія, пярэдняе і заднее навесныя прыстасаванні, сістэма навігацыі, якая дазволіць спецыялістам завода весці маніторынг працы трактароў у рэжыме on-line з Мінска для ацэнкі тэхнічных, эксплуатацыйных і іншых параметраў. Пасля восеньскіх палявых работ будуць прааналізаваны вынікі маніторынгу і ўжо ў 2017 годзе магчымы серыйны выпуск гэтай мадэлі.

Фактычна «Беларус-3522» здольны замяніць дзясятак звычайных трактароў і не саступае замежным аналагам па асноўных працоўных параметрах, у тым ліку па эфектыўнасці».

Сяргей Антонов. Фота Дзмітрыя Осіпава. «Віцебскія весці».