Аляксандр Лукашэнка: Беларусь здолее пераадолець узнікаючыя складанасці, і цяперашні год стане пераломным

Беларусь здолее пераадолець узнікаючыя складанасці, і цяперашні год стане ў гэтым плане пераломным. Пра гэта Кіраўнік дзяржавы Аляксандр Лукашэнка заявіў 16 красавіка, наведваючы ў свята Пасхі храм Праабражэння Гасподняга ў горадзе Барань Аршанскага раёна.

"Мы ўсё можам і мы з гэтымі складанасцямі, пра якія толькі што гаварылі (складанасцямі больш за ўсё прыўнесенымі на нашу зямлю), справімся, пераадолеем. У нас няма іншага выйсця. І цяперашні год будзе пераломным", - заявіў Прэзідэнт.

Аляксандр Лукашэнка падзякаваў усім святарам і мітрапаліту Паўлу за тую працу, якую яны ажыццяўляюць у імя беларускага народа і яго суседзяў.

Знаходзячыся ў праваслаўным храме, Кіраўнік дзяржавы прапанаваў ад імя самай шматлікай рэлігійнай канфесіі ў Беларусі паслаць прывітанне і хрысціянам - каталікам, якія таксама святкуюць Пасху ў гэты дзень. "Гэта сапраўды вялікае і светлае свята, як бы ні спрабавалі яго зацемніць у нашай гісторыі. І нават у нядаўняй. Не атрымалася. Таму што ўвесь народ, ад малога да вялікага, заўсёды з найвялікшай павагай і душэўнасцю чакаў гэтых дзён", - адзначыў Прэзідэнт.

У сваю чаргу архіепіскап Віцебскі і Аршанскі Дзімітрый падкрэсліў важнасць захавання сапраўдных каштоўнасцей і звароту да веры, асабліва з улікам многіх цяжкасцей, якія адбываюцца ў свеце. Ён падзякаваў Аляксандру Лукашэнку і кіраўніцтву краіны ў цэлым за намаганні па падтрыманні добрых адносін і супрацоўніцтва паміж дзяржавай і царквой, а таксама за захаванне ў Беларусі міру і згоды.

Кіраўнік дзяржавы запаліў свечку і перадаў у дар храму ікону "Ісус Хрыстос Усядзержыцель". Прэзідэнту паднеслі ў дар ікону Аляксандра Неўскага.

Пасля наведвання храма Аляксандр Лукашэнка цёпла пагутарыў з мясцовымі жыхарамі, расказаўшы пра перспектывы развіцця ўсяго Аршанскага раёна.

"Вы, напэўна, ведаеце, часам бачыце, што я, калі прыязджаю, абавязкова гляджу на гэтыя цудоўныя мясціны. Яны мне не чужыя. Я вельмі добра

знаю праблемы, якія складаюцца тут - Болбасава, Барань, Орша - у гэтым рэгіёне. Гэта адзін з найскладанейшых рэгіёнаў у Беларусі па працаўладкаванні, занятасці насельніцтва. Так быць не павінна, - сказаў Прэзідэнт. - І ў бліжэйшы час ва ўрадзе мы вельмі сур'ёзна разгледзім пытанні развіцця гэтага рэгіёну, асабліва гэтых населеных пунктаў".

"Калісьці гэта быў адзін з развітых раёнаў. Тут базавалася савецкая авіяцыя стратэгічнага прызначэння. Але здарылася так, як здарылася. І з таго часу, не скажу, што мы ўжо шмат зрабілі, але неяк стараліся людзей заняць", - адзначыў Кіраўнік дзяржавы.

Па словах Аляксандра Лукашэнкі, маюцца перспектывы для развіцця малых населеных пунктаў у Аршанскім раёне і самой Оршы. Гаворка ідзе як аб вытворчым сектары, прыцягненні інвестыцый, так і аб будаўніцтве жылья, транспартнай інфраструктуры. "Будзем развіваць гэты рэгіён. І на працягу года-двух, паверце, мы у асноўным здымем тыя праблемы, якія сёння існуюць", - заявіў Прэзідэнт.

У сувязі з гэтым Аляксандр Лукашэнка заклікаў і да актыўнасці саміх грамадзян: "Трэба прывыкаць да таго, што людзі павінны ісці за працай. Не праца да людзей, а так, як прынята ва ўсім свеце".

Кіраўнік дзяржавы растлумачыў, што трэба будзе надаць увагу развіццю менавіта малых населеных пунктаў, асабліва дзе ёсць добрая інфраструктура. А за кошт удасканалення транспартных зносін жыхары змогуць досыць хутка дабірацца на працу ў суседнія, больш буйныя населеныя пункты.

"І хачу вам публічна сказаць, што і начальнікі тут мясцовыя вельмі марудліва варушацца. Пасяджэнне ўрада мы правядзем тут, на месцы. Але да гэтага часу вы (кіраўніцтва на месцах) паварушыцеся", - заўважыў Аляксандр Лукашэнка. У якасці прыкладу ён прывёў той факт, што месцамі па-ранейшаму застаюцца незадзейнічанымі некаторыя аб'екты, якія пустуюць яшчэ з савецкіх часоў.

"Гэта не справа, што самыя добрыя прыгожыя месцы, зручныя для жыцця людзей, мы не можам прывесці ў парадак. Не скажу, што яны не ў парадку, але яны павінны быць яшчэ лепш, і людзі павінны мецьтут працу. Вось гэта галоўнае пытанне, якое мяне хвалюе. Справа не ў тым, што гэта мая радзіма. Мая радзіма сёння – уся Беларусь. Але гэта месца заслугоўвае свайго развіцця, таму што інфраструктура тут адпаведная", - падкрэсліў Прэзідэнт.

"Паверце, мы ўмеем рабіць усё. Часам і людзі нашы не вельмі актыўныя, чакаюць нечага ад Госпада, але і ўлады не заўсёды варушацца так, як трэба. Я гэта прызнаю. Жывіце доўга, моцнага вам здароўя. Усе праблемы, паверце, мы вырашым", - рэзюмаваў Аляксандр Лукашэнка.

"СБ". Фота БЕЛТА.