Аляксандр Субоцін: "ААТ "Інвет" - лакаматыў эканомікі Верхнядзвінскага раёна"
Сацыяльную накіраванасць працы калектыву падкрэсліў Аляксандр Субоцін.
– «Інвет» – лакаматыў эканомікі Верхнядзвіншчыны. Дзякуючы яму жыве пасёлак і сённяшні юбілей калектыву – гэта свята і жыхароў Бігосава, – адзначыў губернатар. Вынікі дзейнасці прадпрыемства з’яўляюцца прыкладам для іншых. Калектыў выпускае вялікую лінейку прадукцыі і далей пашырае яе асартымент, генеруе шмат ідэй і сам рэалізуе іх.
Прадпрыемства – адно з лепшых у краіне. Па выніках працы за мінулы год стала пераможцам рэспубліканскага конкурсу «Лідэр у галіне эфектыўнасці вытворчасці».
Акцыянернае таварыства «Інвет» знаходзіцца ў падпарадкаванні Міністэрства сельскай гаспадаркі і харчавання, і, натуральна, ацэнку працы прадпрыемства даў міністр Анатоль Ліневіч.
Ён пахваліў калектыў за асваенне новых тэхналогій, забеспячэнне жывёлагадоўлі клеткамі і домікамі для цялят, дзякуючы ім яны даюць добрыя прывасы і вырастаюць добрыя каровы.
– Прадпрыемства ідзе ў нагу з часам, дамінуе на рынку прадукцыі для сяла. Ёсць рух наперад, значыць ёсць і перспектыва развіцця, – сказаў міністр сельскай гаспадаркі і харчавання.
Ганаровыя госці павіншавалі калектыў з юбілеем і пажадалі здароўя, мірнага неба і далейшых вытворчых поспехаў.
За дасягнутыя поспехі ў працы лепшыя работнікі прадпрыемства ўзнагароджаны граматамі рознага ўзроўню.
Акцыянернае таварыства спецыялізуецца на вытворчасці вырабаў з палімерных матэрыялаў, якія вырабляюцца па тэхналогіі ліцця пад ціскам, экструзіі, ратацыйнага фармавання, а таксама на апрацоўцы металаў і сплаваў, для розных галін і сфер прымянення. З'яўляецца адным з нямногіх вытворцаў прадукцыі на постсавецкай прасторы.
– 65 гадоў прадпрыемства жыло і развівалася. Яму ёсць чым ганарыцца, - адзначыў дырэктар ААТ «Інвета» Сяргей Грамадко. – Мы вырабілі мільён паліўных бакаў для Мінскага трактарнага завода і завода «Гомсельмаш», на фермах сельгаспрадпрыемстваў краіны 90 % выкарыстоўваных клетак і домікаў для ўтрымання жывёлы – нашы, канструкцыі «Інвета» ўпрыгожваюць Мінск і сотні іншых беларускіх гарадоў. Але стаяць на месцы нельга і ў планах калектыву новы праект на 2 млн. долараў інвестыцый.
Да юбілею калектыў падрыхтаваўся грунтоўна. Месцам правядзення ўрачыстасцей стаў заводскі стадыён, на тэрыторыі якога разгорнуты шматлікія выставы прадукцыі прадпрыемства, гульнявыя пляцоўкі, фотазоны.
На ўрачыстасць сабраліся не толькі работнікі прадпрыемства, але і жыхары Бігосава, працоўная біяграфія і жыццё якіх цесна звязаны з «Інветам».
Удзельнікаў урачыстасці парадавалі артысты. На сцэне выступіў эстрадна-сімфанічны аркестр ім. Ю.А. Васілеўскага з г. Гомеля.