Аляксандр Субоцін падвёў вынікі важнага этапу сельскагаспадарчага сезона ў Віцебскай вобласці
Напярэдадні абласнога фестывалю-кірмашу працаўнікоў вёскі «Віцебскія весці» папрасілі старшыню аблвыканкама Аляксандра Суббоціна падвесці вынікі важнага этапу сельскагаспадарчага сезона.
– Аляксандр Міхайлавіч, як ацэньваеце мінулую ўборачную кампанію?
– Пад ураджай 2023 года гаспадаркі Віцебшчыны засяялі 350 тыс. га збожжавых і зернебабовых культур, правялі неабходны комплекс работ па падкормцы і доглядзе. Аднак летняя засуха ўнесла карэктывы. Паводле інфармацыі «Віцебскаблгідрамета», з 1 красавіка па 20 ліпеня на тэрыторыі вобласці выпала ападкаў амаль на 60 % менш за норму. У выніку збожжавыя і зернебабовыя загінулі на плошчы 82 тыс. га і былі пераведзены ў кармавую групу. Прадукцыйнасць тых, што засталіся пад уборку, на чвэрць меншая за леташнюю – 24,2 ц/га (у 2022-м – 30,1 ц/га).
У цэлым на Віцебшчыне намалочана 623,1 тыс. т збожжа. Для забеспячэння грамадскага жывёлагадоўлі канцэнтраванымі кармамі прынята рашэнне закупіць недастатковы аб'ём фуражу ў Расійскай Федэрацыі.
– Нягледзячы на складаныя ўмовы надвор'я, шэраг гаспадарак стабільна паказваюць высокія вынікі. Назавіце, калі ласка, лепшых.
– Па ўраджайнасці ў лідарах ААТ «Хацілы-Агра» Пастаўскага раёна (70,6 ц/га), СПК «Ларынаўка» Аршанскага раёна (65 ц/га), РУП «Талачынскі кансервавы завод» (48,9 ц/га). У разрэзе рэгіёнаў лепшыя паказчыкі ў Пастаўскага (34,9 ц/га), Віцебскага (32 ц/га), Аршанскага (31,4 ц/га) раёнаў. Найбольшы валавы намалот у ААТ «Віцебская бройлерная птушкафабрыка» – 45 тыс. т збожжа (апярэджвае 15 раёнаў) з ураджайнасцю 40,8 ц/га.
Дарэчы. На ўборцы ўраджаю працавалі больш за 1000 экіпажаў збожжаўборачных камбайнаў. Больш за 1 тыс. т намалаціў 261 экіпаж, 2 тыс. т – 26. Абсалютны лідар сярод камбайнераў – Максім Серноў з ААТ «Агракамбінат «Юбілейны» Аршанскага раёна, на рахунку якога 3,7 тыс. т.
– Наколькі істотнай была дапамога гараджан ва ўборцы ўраджаю?
– Як і ў папярэднія гады, у перыяд правядзення значных сельскагаспадарчых работ (вясенняй пасяўной кампаніі, нарыхтоўкі кармоў, уборкі ўраджаю) мы вымушаны прыцягваць дадатковыя людскія рэсурсы. Якой бы высокапрадукцыйнай ні была сучасная тэхніка, без чалавека на зямлі не абысціся. З улікам скарачэння сельскага насельніцтва сельгасвытворцы па-ранейшаму адчуваюць дэфіцыт працоўных рук. На перыяд уборкі дадаткова было прыцягнута больш за 470 работнікаў і звыш 190 адзінак тэхнікі, у тым ліку трактары, грузавыя аўтамабілі, пагрузчыкі.
Карыстаючыся выпадкам, хачу падзякаваць усім кіраўнікам прамысловых арганізацый, устаноў адукацыі, якія аказвалі дапамогу вяскоўцам. Асаблівая падзяка тым спецыялістам, хто непасрэдна працаваў у полі.
– Як праходзіць на Віцебшчыне тэхнічнае перааснашчэнне галіны?
– У бягучым годзе сельгаспрадпрыемствы набылі 258 адзінак тэхнікі, у тым ліку 116 збожжаўборачных і 16 кармаўборачных камбайнаў, 46 касілак, 55 прэс-падборшчыкаў.
У рамках даручэння Прэзідэнта Беларусі па эфектыўным выкарыстанні тэхнікі і своечасовым яе рамонце праводзяцца аднаўленчыя работы са павелічэннем рэсурсу выкарыстання на спецыялізаваных прадпрыемствах. Такіх, як Аршанскі інструментальны завод, Віцебскі мотаррамонтны завод, Заходне-Дзвінскі МРС, Верхнядзвінскі райаграсэрвіс, Ціраспальскі агратэхсэрвіс, Аршанскі райаграсэрвіс.
– Аномальнае надвор’е ў канцы вясны – пачатку лета паўплывала і на рост траў. У выніку з першага ўкосу недаатрымана запланаваных аб’ёмаў кармоў. Цяпер для аграрыяў адна з асноўных задач – кампенсацыя страт. Колькі цэнтнераў кармавых адзінак неабходна нарыхтаваць на ўмоўную галаву жывёлы, каб зімовы стойлавы перыяд прайшоў у штатным рэжыме?
– Траўневыя пахаладанні і чэрвеньская засуха не далі поўнага развіцця травам. З першага ўкосу на ўмоўную галаву жывёлы было нарыхтавана 5 цэнтнераў кармавых адзінак, што ў паўтара раза менш леташняга. Былі прыняты пэўныя меры, каб нарыхтоўка кармоў не спынялася: гаспадаркі забяспечваліся гаруча-змазачнымі матэрыяламі, аператыўна ажыццяўляўся рамонт тэхнікі і пастаўка запчастак, былі вызначаны дадатковыя плошчы для нарыхтоўкі кармоў. Як сказана вышэй, 82 тыс. га збожжавых і збожжава-бабовых скасілі на зернасенаж. На плошчы амаль у 17 тыс. га пасеяны прамежкавыя культуры, якімі раней практычна не займаліся. Сёння ідзе трэці ўкос траў, уборка кукурузы і прамежкавых культур. У выніку зараз на ўмоўную галаву жывёлы прыпадае 17,05 ц к. адз., разрыў з мінулым годам паступова скарачаецца (на аналагічную дату ў 2022-м было – 19,50 ц к. адз.). На дадзены моманг з улікам плошчаў кармавых культур, што засталіся, і іх прадуктыўнасці стаіць задача нарыхтаваць на ўмоўную галаву не менш за 22-23 ц к. адз. Калі да іх дадаць пераходны рэштак кармоў мінулага года, то на стойлавы перыяд будзем мець 24-25 ц к. адз., што дастаткова для пераразмоўкі жывёлы. Аграрыям пастаўлена задача восенню пасеяць 50 тыс. га збожжавых і крыжакветных культур, якія вясной будуць выкарыстоўвацца на зялёны корм.
– Як праходзіць закладка асновы ўраджаю 2024 года?
– У збожжавым кліне ўраджаю 2024 года ўдзельная вага азімых, як найбольш прадуктыўных, складзе 60 %. Плошчы пад азімы ячмень, да прыкладу, павялічаны да 16,8 тыс. га, або амаль у дзевяць разоў у параўнанні з мінулым годам. На ўчарашні дзень пасеяна 155,6 тыс. га азімых збожжавых (68 % да задання), што на 36 тыс. га больш за ўзровень мінулага года. У цэлым запланавана пасеяць 230 тыс. га.
– Аляксандр Міхайлавіч, вашы пажаданні хлебаробам напярэдадні «Дажынак»?
– Перш за ўсё, хочацца выказаць словы падзякі ўсім працаўнікам вёскі за карпатлівую працу і адданасць нялёгкай, але ганаровай працы. Нягледзячы на тое, што ўборачная кампанія была няпростай, вы добрасумленна працавалі не пакладаючы рук у будні і выхадныя дні ад світання да світання, праяўляючы прафесіяналізм і адказнасць за даручаную справу.
Няхай у вашых дамах заўсёды будуць дабрабыт, дастатак і соладзь!