Аляксандр Субоцін павіншаваў супрацоўнікаў Віцебскай абласной інспекцыі аховы жывёльнага і расліннага свету з 20-годдзем стварэння службы
Урачыстае мерапрыемства праходзіла ў абласной філармоніі з удзелам кіраўнікоў органаў улады, праваахоўных органаў, з якімі цесна ўзаемадзейнічае Дзяржінспекцыя.
Дзяржаўная інспекцыя аховы жывёльнага і расліннага свету пры Прэзідэнце Рэспублікі Беларусь створана 27 студзеня 2003 года. Асноўнымі задачамі структуры з'яўляецца спыненне фактаў браканьерства, кантроль за аховай і выкарыстаннем аб'ектаў жывёльнага і расліннага свету, лесакарыстання, спыненне незаконных высечак. Штат ведамства па краіне – 545 чалавек, на Віцебшчыне – больш за 60.
Віншуючы супрацоўнікаў прыродаахоўнай службы, старшыня аблвыканкама Аляксандр Субоцін адзначыў, што 20 гадоў нібыта невялікі тэрмін, але ўжо ёсць што прааналізаваць і зрабіць высновы. Дзяржінспекцыя нарадзілася ў няпросты час, яна з гонарам вырашае задачы, для выканання якіх стваралася. Самае галоўнае, што парадку ў лясах і на вадаёмах стала больш.
– Вы ахоўваеце тое, чым наша краіна ганарыцца, чаму нам многія зайздросцяць. Прырода – наша жамчужына, – падкрэсліў кіраўнік вобласці і пажадаў інспектарам больш прафілактычнай працы і менш надзвычайных сітуацый.
Фота Дзмітрыя Восіпава.