Аляксандр Субоцін: справіцца з першым укосам траў Віцебская вобласць павінна да 20–23 чэрвеня, але трэба мабілізавацца
Сёння, 8 чэрвеня, у Полацкім раёне праходзіць абласны семінар-нарада «Аб мерах па арганізацыі і правядзенні карманарыхтоўчай кампаніі ў 2022 годзе». У Віцебскай вобласці паўсюдна наступілі аптымальныя фазы для ўборкі травастою на кармавыя мэты.
У 2021 годзе гаспадаркі Віцебшчыны нарыхтавалі 918,4 тыс. тон травяных кармоў у пераліку на кармавыя адзінкі, або па 23,1 цэнтнера на ўмоўную галаву жывёлы. На гэты год старшыня Віцебскага аблвыканкама Аляксандр Субоцін паставіў задачу аграрыям вобласці:
– З улікам стварэння паўтарагадовага запасу з новага ўраджаю неабходна нарыхтаваць 1,2 млн тон кармавых адзінак травяных кармоў або па 30 цэнтнераў на адну ўмоўную галаву буйной рагатай жывёлы, з іх 125 тысяч тон сена, па 2 млн тон сянажу і сіласу.
Мабілізуйце ўсе тэхнічныя і людскія рэсурсы, арганізуйце працу ў выхадныя і святочныя дні. Давядзіце да выканаўцаў адпаведныя штодзённыя заданні па кашэнні, а іх выкананне вазьміце пад асабісты кантроль.
Таксама Аляксандр Субоцін звярнуў увагу, што кормаўборачная тэхніка павінна працаваць у дзве змены – увесь светлавы дзень (на трамбоўцы – кругласутачна). Пры неабходнасці варта перакідваць яе ў сельгасарганізацыі, якія адстаюць.
На асаблівым кантролі праца прэс-падборшчыкаў-упакоўшчыкаў кармоў у палімерную ўпакоўку. Каб выканаць заданні аблвыканкама (142 тыс. тон, вынік 2021 г. – 86 тыс. тон), трэба забяспечыць высокапрадукцыйную працу ўсіх наяўных прэсаў у складах карманарыхтоўчых атрадаў, укамплектаваўшы іх неабходным наборам тэхнікі.
– У адпаведнасці з даручэннем Кіраўніка дзяржавы трэба выключыць закладку травяных кармоў у бурты і курганы, – нагадаў Аляксандр Субоцін.