Аляксандр Субоцін усклаў кветкі да брацкай магілы вызваліцелям у Суражы
– Тут зарадзіўся партызанскі рух, былі вядомыя на ўвесь свет «Суражскія вароты». Шмат гераічных людзей змагаліся за свабоду і працвітанне. Гэты населены пункт адзін з першых у краіне быў вызвалены ад нямецка-фашысцкіх захопнікаў, – адзначыў Аляксандр Субоцін. – Знамянальна, што сёння падчас правядзення суботніка, у нас ёсць магчымасць не толькі папрацаваць на карысць грамадства, але і аддаць даніну памяці нашым продкам, якія аддалі жыццё за наша мірнае неба, свабоду і незалежнасць.
Прадстаўнікі абласной, раённай улады, прадпрыемстваў, арганізацый, грамадскасці і ўстаноў усклалі кветкі да воінскага пахавання № 4439 у гарпасёлку Сураж. Тут пахавана больш за 390 воінаў і партызан.
Даведка «ВВ». За гады вайны ў Суражскім сельсавеце знішчана больш за 2,5 тыс. мірных жыхароў, 716 чалавек загінула на франтах вайны, у партызанах – 790. Звыш 1,7 тыс. згнана ў фашысцкае рабства, вярнуліся толькі 934 чалавекі. Зімой 1943 года фашысты спальвалі ўсе забудовы ў Суражскім раёне, а ў самым Суражы засталося толькі два дамы. У Суражскай зоне зарадзіўся партызанскі рух. Тут у лютым 1942 года была прарвана лінія фронту паміж Вяліжам і Усвятамі. Гэты разрыў атрымаў назву «Суражскія (Віцебскія) вароты», якія былі дарогай жыцця для тысяч дзяцей, жанчын, старых, якія ратаваліся ад звярстваў нацыстаў, вывозіліся параненыя, ішло папаўненне шэрагаў Чырвонай Арміі. За мужнасць і стойкасць, праяўленыя абаронцамі гарадскога пасёлка Сураж у гады Вялікай Айчыннай вайны, у 2010 годзе Указам Прэзідэнта Беларусі гарадскі пасёлак узнагароджаны вымпелам «За мужнасць і стойкасць у гады Вялікай Айчыннай вайны».
"Віцебскія весці"