Аляксандр Субоцін уручыў дыпломы выпускнікам Гарадоцкага аграрна-тэхнічнага каледжа
Старшыня Віцебскага аблвыканкама Аляксандр Субоцін прыняў удзел у урачыстай цырымоніі ўручэння дыпломаў выпускнікам Гарадоцкага аграрна-тэхнічнага каледжа.
Сёлета сцены навучальнай установы пакінула каля 80 юнакоў і дзяўчат, якія атрымалі прафесійна-тэхнічную адукацыю. Частка з іх разам з дыпломам атрымала граматы і падзякі за паспяховую вучобу і актыўнасць у грамадскім жыцці. З такой знамянальнай падзеяй маладых людзей павіншавалі не толькі педагогі і прадстаўнікі райвыканкама, але і кіраўніцтва абласной улады.
— Завяршыўся адказны і важны этап у вашым жыцці. Ён каштоўны не толькі для вас, але і для раёна і вобласці, якія маюць патрэбу ў падрыхтаваных кадрах, асабліва на вёсцы. Таксама мы будзем рады, калі вы вырашыце працягнуць навучанне ў ВНУ, — сказаў старшыня аблвыканкама Аляксандр Субоцін. — Спадзяюся, вы будзеце ўспамінаць час, праведзены ў каледжы, з ностальгіяй і падзякай за веды, якія дазволілі стаць самастойнымі і патрэбнымі грамадству.
