Аляксандр Субоцін сустрэўся з прадстаўнікамі СМІ, паліграфічных прадпрыемстваў і арганізацый сувязі
Сустрэчы, прымеркаваныя да прафесійных святаў – Дня друку і Дня работнікаў радыё, тэлебачання і сувязі – добрая традыцыя. Сёлета журналістаў сабраў Медыяцэнтр Віцебскай вобласці.
У праграме – выстава і інтэрактыўныя пляцоўкі СМІ, арганізацый сувязі, прэс-канферэнцыя. Традыцыйнай кульмінацыяй сустрэчы стала ўзнагароджанне пераможцаў абласнога конкурсу сярод журналістаў і рэдакцый.
Па традыцыі Медыяцэнтра Віцебскай вобласці Аляксандр Міхайлавіч адказаў на пытанні генератара выпадковых пытанняў:
– Які навык ці ўменне Вы хацелі б асвоіць?
– Катацца на каньках.
– Якая Ваша любімая цытата ці прымаўка?
– Рабі, што павінен, і будзе, што будзе.
– Наколькі значная і карысная для Вас сустрэча з журналістамі?
– Вельмі важная. Гэта выдатная магчымасць падняць пытанні, сумленна адказаць на іх і зразумець, што адбываецца вакол.
Не толькі Віцебскам
Адказваючы на пытанне, у якіх раёнах губернатару даводзілася бываць часцей за ўсё, Аляксандр Саббоцін адзначыў, што пабываў усюды, але адназначна не зазірнуў ва ўсе куткі.
– Гэта звязана з тым, што праца ў мяне больш штабная, якая патрабуе асабістага ўдзелу ў вырашэнні тых ці іншых праблем, – прызнаўся кіраўнік вобласці. – Так атрымалася, што ў першы дзень пасля майго прызначэння я наведаў самы старажытны горад нашай краіны – Полацк. Напэўна, часцей за іншыя гарады і наведваем менавіта яго. Безумоўна, частыя візіты і ў аршанскі рэгіён выбраны як пілотны праект для ажыццяўлення развіцця гарадоў з насельніцтвам звыш 80 тысяч жыхароў. У канцы гэтага года ўжо можна будзе казаць пра тое, што атрымалася ці не, што трэба падправіць, на што рабіць стаўку іншым гарадам.
Губернатар падкрэсліў, што кожны раён вобласці мае сваю спецыфіку.
Інвестпраектам дарогу
Каментуючы пытанне аб інвестыцыйнай тэндэнцыі апошніх гадоў, а таксама аб ходзе выканання даручэння Прэзідэнта «Адзін раён – адзін праект», кіраўнік вобласці адзначыў, што ў інвестыцыйны партфель вобласці ўключаны 23 праекты. Але па факце іх больш, і над рэалізацыяй сваіх ідэй працуюць у кожным раёне.
– 23 праекты адабрана, таму што было жорсткае даручэнне: мінімум адзін праект – адзін раён, і на вобласць адзін ці два велізарных праекты, – канстатаваў Аляксандр Субоцін. – Мы (улада і бізнес) знаходзімся ў такім «спячым» рэжыме: нехта баіцца нешта новае пачынаць, нехта не ведае, як падысці, нехта не разумее, за што ўзяцца ў тым ці іншым раёне. Асабіста я бачу, што даручэнне заклікана зрушыць гэты камень з месца. Таму што ўся ініцыятыва, усё развіццё ляжыць у плоскасці не выканкама, не раёна, а ў плоскасці звычайных людзей. Хтосьці пякарню маленькую робіць, хтосьці пачынае каву варыць на плошчы, хтосьці адкрывае вытворчасць. І вось усё гэта заклікана раскачаць наша грамадства ў добрым сэнсе гэтага слова і паказаць напрамак, як гэта можна рэалізаваць. Бо ёсць вельмі шмат падыходаў па льготным крэдытаванні, ёсць пляцоўкі, дзе можна нейкую тэхналогію падгледзець і перавесці на сваю фірму, свой стартап. Ёсць людзі, якія гатовыя ўкласціся і падтрымаць, дапамагчы ажыццявіць гэты працэс. Сэнс ад даручэння я бачу ў першую чаргу ў тым, каб потым увесь гэты працэс працягваў жыць далей, і жыць вельмі інтэнсіўна.
Кіраўнік вобласці таксама адзначыў, што ёсць і дробныя прадпрыемствы, дзе два-тры працоўныя месцы, а ёсць і буйныя, дзе 50 – 60 чалавек ужо плануецца набраць. Гэта Фармсфера, дрэва- і металаапрацоўка. Хтосьці па высокіх тэхналогіях, пачынаючы ад напісання софту, заканчваючы стварэннем электрамабіляў. Ёсць у рэгіёне такія вядомыя на ўвесь свет прадпрыемствы.
Аб аказанні медыцынскай дапамогі на месцах
– Сёння ў нашых установах аховы здароўя развіваецца матэрыяльна-тэхнічная база: у аддаленых рэгіёнах з'яўляюцца добрыя аперацыйныя, МРТ, лапараскапічныя стойкі. Такім чынам, даступнасць правядзення хірургічных і тэрапеўтычных мерапрыемстваў узрастае. На фоне ўсяго гэтага стан устаноў аховы здароўя ў Віцебску выклікае, ва ўсякім выпадку ў мяне, вялікія асцярогі. Сярод іх, напрыклад, абласная і інфекцыйная бальніцы. Усё няпроста ідзе, але мы будзем рабіць і інфекцыйную бальніцу, і зараз на стадыі выхаду праект па абласной бальніцы. Гэта будзе новы шасціпавярховы аперацыйна-рэанімацыйны блок з сучасным абсталяваннем. Потым ужо возьмемся аднаўляць астатнія здраўніцы, – адзначыў Аляксандр Субоцін.
Што тычыцца ўрачоў, то самае важнае – магчымасць рэалізацыі нашых студэнтаў, якія становяцца ўрачамі, іх кар'ернага росту і магчымасць працаваць на новым перспектыўным абсталяванні, атрымліваючы навыкі, павышаць прафесійны ўзровень. Калі казаць пра механізмы ўтрымання спецыялістаў, то яны ёсць больш жорсткія, напрыклад мэтавая падрыхтоўка, адміністрацыйны рэсурс, які не заўсёды спрацоўвае эфектыўна, але яны маюць месца. Але ўсё роўна стаўку робім і на інстытут настаўніцтва (прычым не толькі ў медыцыне, але і ў іншых галінах: аграрным комплексе, прамысловасці). Гэта і даплаты маладым спецыялістам, забеспячэнне жыллём, сацпакет і многае іншае.
Віцебшчына турыстычная
Калі казаць мовай лічбаў, то за 2022 год колькасць турыстаў у Віцебскай вобласці вырасла больш чым у 4,5 раза. Гэта хутчэй за ўсё звязана з тым, што для многіх нашых усходніх суседзяў заходнія краіны закрыліся. Плюс расце цікавасць да гісторыі роднага краю, краіны.
– Я ведаю шмат людзей, якія сем’ямі ездзяць па Беларусі і паказваюць сваім дзецям нашы багацці, – сказаў Аляксандр Субоцін. – Павелічэнне турыстычнага патоку прымусіць нас больш адказна падыходзіць да захавання культурных каштоўнасцей, ды і да парадку каля нашых дамоў. Шмат прывабных мясцін для мяне асабіста магу назваць, але год таму адкрыў для сябе Музей гісторыі Віцебскага народнага мастацкага вучылішча, створанага Маркам Шагалам 100 гадоў таму. Я чалавек не глыбока пагружаны ў такое незвычайнае мастацтва, але быў здзіўлены, што менавіта ў нас была створана сусветная школа дызайну, што ў нас працавалі людзі, якія будавалі Нью-Ёрк, а таксама Малевіч, Шагал, ды і цэлая плеяда гіпервядомых ва ўсім свеце мастакоў.
Аб дарогах і навядзенні парадку на зямлі
Аляксандр Субоцін сказаў, што навядзенне парадку на зямлі, стан дарог – самыя вострыя і самыя крытычныя пытанні для яго асабіста. Ён таксама падкрэсліў, што сёлета на рамонт, у тым ліку і капітальны, рэканструкцыю, будаўніцтва дарог у вобласці выдзелена больш за 100 млн рублёў.
– Трэба сказаць, што Віцебская вобласць другая па працягласці дарожнай сеткі. Як вы думаеце, колькі ў нас дарог у кіламетрах? Больш за 16 тысяч км дарог у вобласці і некалькі сотняў мастоў, якія таксама патрабуюць рамонту, – канстатаваў кіраўнік вобласці. – Шмат планаў і па Віцебску, і па раёнах. Зразумела, што ўсё адразу абняць мы не можам. Ідзе мадэрнізацыя дарогі М3 ад Бегамля праз Лепель, Бешанковічы да Віцебска. У планах «дацягнуць» двухпалосную ў абодва бакі дарогу да Беразінскага запаведніка. Актыўна развіваем працэс рамонту дарогі Е95 ад Оршы праз Віцебск на Санкт-Пецярбург. Рыхтуюцца праекты, будзем яе рабіць, пашыраць. Увогуле, запэўніваю, дарогам у нашай вобласці – самае пільную ўвагу.
Аб будучыні АПВ
Аляксандр Субоцін упэўнены, што ў аддаленай перспектыве будзе адбывацца укрупненне аграпрамысловых аб'яднанняў, але рабіць гэта трэба па розуме і паэтапна.
На сённяшні дзень праблема знаходзіцца ў плоскасці вытворчасці сыравіны і максімальнай загрузкі перапрацоўчых прадпрыемстваў, каб яны самастойна выконвалі даўгавыя абавязацельствы, запускалі новыя інвестыцыйныя цыклы, ажыццяўлялі мадэрнізацыю, распрацоўвалі новыя віды прадукцыі і асвойвалі новыя рынкі.
Цяпер упор робіцца на вытворчасць сельгаспрадукцыі ў сыравінных зонах і вывядзенне стратных гаспадарак на прыбытковасць. Дарэчы, аграрыі Віцебшчыны займаюць трэцяе месца па тэмпах яравой сяўбы пасля Брэсцкай і Гродзенскай абласцей. На дадзены момант валавы надой малака на 7 % больш за леташні.
Пра Дзень беларускага пісьменства
30-ы, юбілейны, Дзень беларускага пісьменства пройдзе ў Гарадку.
Аляксандр Субоцін лічыць, што асноўным крытэрыем выбару сталіцы рэспубліканскага свята з'яўлялася тое, што Гарадоцкая зямля – радзіма Канстанціна Вераніцына, аўтара аднаго з самых вядомых беларускіх твораў ХІХ стагоддзя.
Гарадок актыўна рыхтуецца, каб годна сустрэць гасцей.
Пра губернатарскі палац
Нядаўна былы губернатарскі палац перададзены ва ўласнасць Віцебскай вобласці. Тут плануецца стварыць шматфункцыянальны комплекс з заламі прыёму высокіх гасцей і ўрачыстых абрадаў. Ёсць ідэя аднавіць дамавую царкву, дзе змогуць абвянчацца маладыя, абсталяваць кафэ з прыгожымі відамі з вокнаў.
Палац мае багатую гісторыю і бачыў Напалеона Банапарта, Лаўрэнція Берыю, вялікага князя Канстанціна Паўлавіча, які сканаў тут у чэрвені 1831 года пры дзіўных абставінах. Аляксандр Субоцін выказаў надзею, што гістарычны будынак стане адной з турыстычных жамчужын Віцебска.
Пра «Дажынкі»
Абласны фестываль-кірмаш працаўнікоў вёскі «Дажынкі-2023» пройдзе ў Шаркаўшчыне і дасць старт чараду падобных святаў у рэгіёнах. Ушанаванне перадавікоў з вялікім канцэртам адбудзецца ў Віцебску да Дня работнікаў сельскай гаспадаркі і перапрацоўчай прамысловасці АПК па прыкладзе мінулага года.
Сталіца «Дажынак-2023» абнаўляецца. У спісе сярэдняя школа, дзіцячы сад, школа мастацтваў. Здача лазнева-пральнага камбіната дазволіць вывесці на поўную магутнасць фізкультурна-аздараўленчы комплекс. Капітальны рамонт будзе праведзены больш чым у дзесяці жылых дамах, бягучы – у 26. Таксама завершыцца будаўніцтва 40-кватэрнага дома.
Аляксандр Субоцін упэўнены, што падрыхтоўка да «Дажынак» надасць больш яркіх фарбаў такому выдатнаму сталічнаму пасёлка, як Шаркаўшчына.
Аляксандр Субоцін павіншаваў журналістаў са святам і адзначыў, што ад іх залежаць матывацыя і аптымізм чытачоў і гледачоў. Вельмі важна фарміраваць інфармацыйнае поле з патрыятычным пасылам: любіць свой дом, вуліцу, месца, у якім чалавек жыве. Трэба, каб гэта стала модна, і тады ў нас усё атрымаецца.
