Алея бацькоў у Першамайскім раёне Віцебска папоўнілася пяццю новымі дрэўцамі ў гонар народжаных у Дзень маці дзяцей

Чацвёра хлопчыкаў і адна дзяўчынка з'явіліся на свет у Дзень маці ў Віцебскім гарадскім клінічным радзільным доме № 2. Для маладых бацькоў была арганізавана акцыя «Белая Русь – з любоўю да дзяцей», у якой прынялі ўдзел старшыня абласнога Савета дэпутатаў, старшыня абласной арганізацыі РГА «Белая Русь» Дзмітрый Дземідаў, кіраўнік адміністрацыі Першамайскага раёна Яўген Семянёнычаў, старшыня Першамайскай раённай арганізацыі РГА «Белая Русь» Аляксандр Каплеўскі, галоўны ўрач радзільнага дома № 2 Дзмітрый Сержантаў.

– Нараджэнне дзіцяці для кожнай сям'і гэта асаблівая падзея і шчасце на ўсё жыццё, – падкрэсліў Дзмітрый Дземідаў. – Вельмі сімвалічна, што сёння мы віншуем маладых мам, якія сталі насіць гэты ганаровы статус у Дзень Маці. Гэта адно з самых душэўных, самых цёплых святаў у нашай краіне, калі ёсць магчымасць выказаць пачуцці ўдзячнасці сваім маці, падзякаваць нашым жонкам, якія падарылі нам дзяцей.

Маладым сем'ям ад «Белай Русі» ў гэты дзень былі ўручаны сертыфікаты на набыццё тавараў, букеты кветак, сродкі па доглядзе і сімвалічны «буслік», які, як вядома, прыносіць у дом шчасце мець дзіця. Дарэчы, вяртацца ў радзільны дом за новым папаўненнем сямейства таксама пажадалі маладым бацькам.

– Падтрымка мацярынства і дзяцінства – адна з асноўных задач нашай дзяржавы. Уручаючы падарункі ад арганізацыі «Белая Русь», мы тым самым звяртаем увагу на тое, што неабходна захоўваць традыцыйныя каштоўнасці нашай сям'і і супрацьстаяць таму мэтанакіраванаму ціску, які ажыццяўляецца з боку калектыўнага Захаду па ўкараненні дэструктыўных традыцый тыпу чайлдфры, позняе ўступленне ў шлюб і гэтак далей, – акцэнтаваў Дзмітрый Дземідаў. – Гэтая тэма, ад якой залежыць дэмаграфічная, нацыянальная бяспека нашай краіны. Таму так важна захоўваць нашы сем'і, нашы традыцыі і рабіць усё, каб нашы дзеці раслі ў поўных сем'ях у атмасферы любові, клопату, былі заўсёды акружаны ўвагай, а бацькі ўсведамлялі ўласную адказнасць за лёс сваіх дзяцей.

Традыцыя садзіць дрэвы ў Дзень бацькі была ініцыявана Першамайскай раённай арганізацыяй РГА «Белая Русь» у 2022 годзе, калі ў Беларусі ўпершыню адзначалі Дзень бацькі. Спачатку саджанцы былі пасаджаны членамі арганізацыі – бацькамі сем'яў, затым традыцыю сталі працягваць бацькі дзяцей, народжаных падчас Тыдня бацькоўскай любові ў гэтай установе аховы здароўя.

Пасля ўрачыстасці ў раддоме была перарэзана чырвоная стужка – адкрыта імянная шыльда алеі, на якой высаджаны пяць маладых туй.