"Амкадор" ідзе да сваіх пакупнікоў і прэзентуе ў Верхнядзвінску новую сельгастэхніку

7 красавіка, Віцебск /Дзіяна Курыло - БЕЛТА/. ААТ "Амкадор" ідзе да сваіх патэнцыйных пакупнікоў і прэзентуе ў Верхнядзвінску сельскагаспадарчую тэхніку. Семінар-прэзентацыя для кіраўнікоў і спецыялістаў гаспадарак Віцебскай вобласці пройдзе 8 красавіка ў Верхнядзвінскім райаграсэрвісе, паведамілі карэспандэнту БЕЛТА ў прэс-службе ААТ "Амкадор". Прадпрыемства будзе дэманстраваць 7 машын. Сярод іх як добра зарэкамендаваўшыя сябе пагрузчыкі розных мадыфікацый, так і навінкі: машына для трамбоўкі сенажу "Амкадор 352С-02" і пагрузчык з тэлескапічнай стрэлай "Амкадор 527". Машына для трамбоўкі сенажу запушчана ў серыйную вытворчасць у 2010 годзе. У ходзе эксплуатацыйных выпрабаванняў яна паказала добрыя тэхніка-эканамічныя магчымасці на ўкладцы і трамбоўцы сіласнай масы ў траншэйныя сховішчы наземнага тыпу, забяспечваючы раўнамерную ўкладку сіласнай масы з неабходнай шчыльнасцю. Машына зручная ў кіраванні, валодае манеўранасцю, магчымасцю ўтрамбоўваць цяжкадаступныя месцы сховішчаў (вуглы, краі траншэй уздоўж сценак), эканамічная ў расходаванні паліва і высокапрадукцыйная. Пагрузчык з тэлескапічнай стрэлай "Амкадор 527" выкарыстоўваецца на складаванні збожжа, цюкоў сена, саломы, лёну на вялікую вышыню, як пад дахі спецыяльных навесаў, так і на адкрытых пляцоўках. Яго грузападымальнасць да 2,5 т, а вышыня пагрузкі да 7 м. Пагрузчык абсталёўваецца сямі хутказменнымі прыстасаваннямі: коўшамі рознага аб'ёму, грузавымі віламі, захопам для цюкоў і іншымі. У семінары прымуць удзел больш за 60 прадстаўнікоў сельгаспрадпрыемстваў. Мадэльны шэраг ААТ "Амкадор" налічвае больш за 80 мадэляў і мадыфікацый тэхнікі. Прадпрыемства з'яўляецца адным з найбуйнейшых вытворцаў дарожна-будаўнічай, сельскагаспадарчай, лясной, камунальнай, снегаўборачнай і іншай спецыяльнай тэхнікі ў краінах СНД. Таварыства мае сертыфікат адпаведнасці сістэмы менеджменту якасці ІSО 9001-2001 і DIN EN ISO 9001:2000, адзначана прэміяй Урада Рэспублікі Беларусь за дасягненні ў галіне якасці. -0-