Анатоль Ліневіч: адно з рашэнняў пытання добраўпарадкавання старых двароў – удзел жыхароў
На прамую тэлефонную лінію і асабісты прыём да Анатоля Ліневіча звярнуліся больш за 30 чалавек. Самая вялікая колькасць пытанняў датычылася жылфонду: расколіны ў дамах, няўцепленыя швы паміж бетоннымі плітамі, холад у кватэры, праблемы дрэннай вентыляцыі ў доме, аплата камунальных паслуг, у тым ліку разлік за водазабеспячэнне, добраўпарадкаванне дваравых тэрыторый. Па кожнай з заяўленых праблем памочнік Прэзідэнта даручыў разабрацца дэталёва. "Адносна добраўпарадкавання двароў часоў савецкай забудовы ёсць станоўчы прыклад узаемадзеяння ўладаў, ЖКГ і саміх жыхароў. Як распавёў адзін з заяўнікаў, які ўзняў гэту тэму, у суседнім доме жыхары набылі неабходныя матэрыялы, а работнікі адпаведнай службы заасфальтавалі двор. Гэта можа быць адным з узаемавыгадных рашэнняў", - адзначыў Анатоль Ліневіч.
Анатоль ЛіневічЁн дадаў, што ў доме, дзе пражывае палачанін, асноўны кантынгент – пенсіянеры, якія не могуць сабе дазволіць такім чынам добраўпарадкаваць прылеглую тэрыторыю, але і ў гэтым выпадку рашэнне знойдзецца.
Як распавёў старшыня Полацкага райвыканкама Ігар Марковіч, штогод у горадзе добраўпарадкоўваюць 15-17 двароў за кошт бюджэтных сродкаў. Кожны "прэтэндэнт" на капрамонт выбіраецца камісіяй, якая аб'язджае горад і ацэньвае стан праезнай часткі, тратуараў і зялёных зон. Кіраўнік раёна таксама распавёў, што жыльцы, калі не могуць унесці свой фінансавы ўклад для набыцця матэрыялаў, займаюцца пасадкай дрэў або разбіваюць клумбы пад вокнамі, надаючы свайму двару дагледжаны выгляд. Анатоль Ліневіч адзначыў, што да планавага добраўпарадкавання можна на конкурснай аснове ўключаць яшчэ 3-4 дадатковыя аб'екты, дзе жыльцы гатовыя стаць суўладальнікамі ў правядзенні капрамонту. Гэтае пытанне мясцовая ўлада возьме на разгляд.
З няпростым пытаннем на прыём да памочніка Прэзідэнта звярнуліся дзве наваполачанкі. Ужо некалькі гадоў яны спрабуюць даведацца, чым іх 12-павярховая маласямейка адрозніваецца ад дакладна такіх жа дзвюх суседніх, дзе жыльцы плацяць за ваду ў два разы менш. Іх дом неаднаразова наведвалі камісіі, правяралі лічыльнікі вады, але знайсці прычыну высокіх паказанняў не могуць. Анатоль Ліневіч даручыў кіраўніку жыллёва-камунальнай службы Наваполацка разабрацца ў сітуацыі, высветліць, чаму ў гэтым доме такія затратныя энерганосьбіты, і падчас яго візіту ў Наваполацк, які адбудзецца праз тыдзень, далажыць аб выніках.
Нямала зваротаў адносілася да стану дарог. Праезнае палатно некаторых вуліц, аддаленых ад цэнтра горада, у міжсезонне становіцца непраходным для аўтатранспарту з-за ям і лужын. Пешаходныя дарожкі альбо адсутнічаюць, альбо прыйшлі ў заняпад.
Старшыня райвыканкама па кожным з заяўленых пытанняў зрабіў распараджэнні, некаторыя ўзяў на асабісты кантроль. Як, напрыклад, дарогі ў мікрараёне Заполле. Тут праезнае палатно праходзіць пад мостам, з якога ў адлігу сцякае расталая вада, ператвараючыся з наступленнем замаразкаў у лёд, па якім не праехаць. Дарожнае палатно ў мікрараёне разбіта, ямы вясной заліты вадой, так што і машыны, і людзі з цяжкасцю выбіраюцца ў горад. Таксама адсутнічаюць на дарозе тратуары. Ігар Маркавіч запэўніў, што як толькі высахнуць лужыны, будзе праведзены ямачны рамонт, а таксама ўсталююць агароджу для пешаходнай зоны і адрамантуюць тратуары. Дзве жыхаркі Заполля, якія звярнуліся на прыём да памочніка Прэзідэнта, паскардзіліся і на занядбаны стан абочын. "Новую дарогу вам не пракладуць, але даглядаць за тымі, якія ёсць, будуць. Некаторыя работы, як, напрыклад, высечку хмызняку на абочынах, вы можаце правесці і самі, проста ўзгадніце гэтыя работы з адпаведнымі службамі. Ніхто не будзе супраць, каб вы паўдзельнічалі ў навядзенні парадку на зямлі, такія ініцыятывы толькі вітаюцца", - падкрэсліў Анатоль Ліневіч.
Пенсіянерка з Полацка, якая звярнулася на прамую тэлефонную лінію, турбавалася з нагоды ўзрастаючай колькасці выпадкаў махлярства з банкаўскімі карткамі, ад якога пакутуюць яе знаёмыя. Яны нярэдка становяцца ахвярамі несумленных людзей, якія нажываюцца на даверлівасці пенсіянераў і ўмеюць падманам выкрасці іх зберажэнні. Заяўніца прапанавала размяшчаць на вялікіх рэкламных білбордах інфармацыю аб прыёмах, якія выкарыстоўваюць віртуальныя злачынцы. І скласці для пенсіянераў памятку, у якой варта ўказаць, што работнікі банка не маюць права тэлефанаваць кліентам і вырашаць пытанні па тэлефоне, а толькі запрашаць грамадзян у найбліжэйшае аддзяленне банка, дзе асабіста праводзяць гутарку з кожным індывідуальна. Полачанка распавяла, што менавіта адзін з такіх даступных білбордаў знаходзіцца ў тым раёне, дзе яна пражывае. Анатоль Ліневіч адказаў заяўніцы, што яе прапанова будзе разгледжана, а мясцовыя ўлады абавязаліся правесці агульную з банкамі асветніцкую працу сярод прадстаўнікоў залатога ўзросту.
Некалькі чалавек, якія дазвоніліся на прамую лінію і прыйшлі на асабісты прыём, распавялі пра праблему, звязаную з пераходам на электрычнае ацяпленне дамоў. Старыя лініі электраперадач і падстанцыі не могуць вытрымаць павялічаную нагрузку, а таму неабходна будаваць новыя падстанцыі, мяняць электрасеткі. Анатоль Ліневіч адзначыў, што гэтая праблема актуальная не толькі для Полацкага раёна, але і для іншых рэгіёнаў Віцебскай вобласці. Яе асноўнае рашэнне - узвядзенне новых, больш магутных падстанцый, і праца гэтая вядзецца паэтапна. Распрацаваны графік будаўніцтва, па якім будзе весціся мадэрнізацыя энергасістэмы. "Трэба разумець, што адначасова ва ўсіх населеных пунктах выканаць такія работы немагчыма. І што гэтае пытанне знаходзіцца на кантролі ўрада і адпаведных ведамстваў", - падкрэсліў памочнік Прэзідэнта.
Бяздомныя сабакі на вуліцах Полацка, з'яўленне зграі ваўкоў у адной з вёсак раёна, перанос аўтобуснага прыпынку на ранейшае месца для пенсіянераў з садовага таварыства, афармленне зямельнага ўчастка, у тым ліку праз суд, - гэтыя і іншыя пытанні Анатоль Ліневіч даручыў вывучыць, знайсці рашэнне ў адпаведнасці з заканадаўствам і далажыць аб выніках яму.-0-
