Андрэйчанка пракантраляваў эпідсітуацыю ў дамах-інтэрнатах Віцебскай вобласці
Старшыня Палаты прадстаўнікоў Нацыянальнага сходу Рэспублікі Беларусь Уладзімір Андрэйчанка па даручэнні Кіраўніка дзяржавы пракантраляваў эпідэміялагічную сітуацыю ў дамах-інтэрнатах Віцебскай вобласці.
Уладзімір Андрэйчанка наведаў Бабініцкі псіханеўралагічны дом-інтэрнат для састарэлых і інвалідаў у Аршанскім раёне.
У Рэспубліцы Беларусь 156 дамоў-інтэрнатаў і аддзяленняў кругласутачнага знаходжання, дзе пражывае каля 21 тысячы чалавек, працуе 14 тысяч персаналу. Самая вялікая колькасць такіх сацыяльных устаноў, 36, у Віцебскай вобласці. З-за няпростай сітуацыі з ковідам у краіне Прэзідэнт Рэспублікі Беларусь даручыў дэпутацкаму корпусу ўзяць пад кантроль і аказаць неабходную дапамогу інтэрнатам, каб супрацьстаяць каранавірусу.
– У нас у кожным выбарчым акрузе дэпутаты разам з мясцовымі органамі ўлады гэтае пытанне трымаюць на кантролі. Дзякуючы зладжанай працы, у тым ліку і з Міністэрствам працы і сацыяльнай абароны, Міністэрствам аховы здароўя, мы не дапусцілі ўспышак пандэміі ў сацыяльных установах. Дастаткова сказаць, што на 29 кастрычніка з 21 тысячы пражываючых у дамах-інтэрнатах і аддзяленнях кругласутачнага знаходжання толькі 33 чалавекі захварэлі на каранавірус, яны на лячэнні ў медустановах, – паведаміў Уладзімір Андрэйчанка.
У сацыяльных інтэрнатных установах Віцебскай вобласці няма хворых сярод пастаяльцаў, сітуацыя стабільная, падкантрольная, паведаміў старшыня камітэта па працы, занятасці і сацыяльнай абароне Віцебскага аблвыканкама Аляксандр Хрыстафораў:
– Калі пачынаўся ковід, мы рабілі ўпор на ізаляцыю пражываючых у дамах-інтэрнатах і вахтавы метад працы супрацоўнікаў у рэжыме поўнай ізаляцыі. Цяпер рэжым поўнай ізаляцыі мы захоўваем, але вахтавы метад адменены пасля таго, як былі вакцынаваны 100% пражываючых, за выключэннем тых, у каго ёсць проціпаказанні, і 100% персаналу. Таму сярод пражываючых хворых няма і мінімум супрацоўнікаў, якія перанеслі гэтую хваробу.
Гэтыя ж меры дазволілі захаваць здароўе 379 пастаяльцаў Бабініцкага дома-інтэрната, дзе да 1 мая працавалі вахтавым метадам, пакуль не вакцынаваліся.
– Мы і цяпер выконваем усе абавязковыя меры засцярогі і не толькі. Людзі пражываюць паблочна, распрацавалі асобныя маршруты для пражываючых і санітараў, суткі працуем, чатыры дома. Усё, што неабходна, у нас ёсць, у тым ліку трохмесячны запас медыкаментаў, – распавяла дырэктар Бабініцкага псіханеўралагічнага дома-інтэрната для састарэлых і інвалідаў Святлана Чэпік.
У штаце сацыяльнай установы пяць урачоў з больш чым 230 медыцынскіх работнікаў, якія сочаць за здароўем пражываючых. Створана добрая медыцынская база. У ўласнай лабараторыі робяць аналізы, аказваюць паслугі ў фізіятэрапеўтычным, працэдурным, масажным, стаматалагічным кабінетах, ёсць свая саляная пячора.
– Пакуль у сваёй лабараторыі мы не робім ПЦР-тэсты, але плануем пачаць у бліжэйшы час, – адзначыла Святлана Чапік.
У Бабініцкім доме-інтэрнаце поўным ходам ідзе капітальны рамонт, пачаты летась. На яго выдзелена больш за 4 млн рублёў, за гэты год асвоена 2,6 млн рублёў. Работы ідуць як унутры памяшкання, так і па добраўпарадкаванні. Спраўджаны жаночы блок, заканчваюцца будаўніча-мантажныя работы ў мужчынскім блоку і адміністрацыйным корпусе, пачаты ў харчаблоку. Наперадзе мадэрнізацыя гаспадарчага корпуса, агароднінасховішча, ліфтавага абсталявання.
У рамках бягучага рамонту абнавілі сантэхнічнае абсталяванне, вокны, балконы, замянілі сістэмы ацяплення і агароджы, пафарбавалі фасады, усталёўваюць сістэмы відэаназірання.
Сёлета набылі легкавы аўтамабіль, камп'ютарную тэхніку, медыцынскае, кухоннае і асвятляльнае абсталяванне, гукавую апаратуру, кіна- і дызель-генератарную ўстаноўку.
Для працоўнай тэрапіі ў доме-інтэрнаце ёсць чатыры майстэрні: сталярная, швейная, па раслінаводстве і «Паветраны настрой». Тут вырабляюць кошыкі, скрынкі, пасцельную бялізну, вырошчваюць расаду кветак і агародніны для сябе, на рэалізацыю і пад заказ прадпрыемстваў і арганізацый. Плануюць адкрыць яшчэ адну майстэрню лазерна-гравіравальнай рэзкі.
Ва ўстанове ёсць 70 гектараў сельскагаспадарчых земляў, на якіх вырошчваюць агародніну, садавіну, ягады для ўласных патрэб, звыш нормы рэалізуюць. Тут жа нарыхтоўваюць корм для 40 галоў КАР, 17 з якіх – дайныя каровы.
– Пакуль ідзе рамонт і пандэмія, масавыя мерапрыемствы не праводзім і рыхтуемся да рэвакцынацыі ў пачатку лістапада, бо ўжо мінуў паўгадавы тэрмін з таго часу, як мы рабілі прышчэпкі ад каранавіруснай інфекцыі, – адзначыла Святлана Чэпік.