Апарат штучнай вентыляцыі лёгкіх перадаў Фонд міру абласному спецыялізаванаму Дому дзіцяці
Як патлумачыла галоўны ўрач абласнога спецыялізаванага Дома дзіцяці Алена Мiзёркiна, аналагічны апарат цяпер працуе ў палаце паліятыўнай дапамогі, ён зараз падтрымлівае жыццё адной малой. Там жа будзе ўстаноўлены падораны. Яшчэ двое дзяцей у Віцебску і Глыбокім знаходзяцца на штучнай вентыляцыі лёгкіх на даму пасля адпаведнага навучання бацькоў. Хоць стацыянары ў рэгіёне забяспечаны апаратамі ШВЛ для такіх дзяцей стопрацэнтна, ацэньваючы перспектыву развіцця менавіта надомнага догляду, калі дзіця знаходзіцца ў сям'і, можна казаць аб патрэбе ў дадзеным абсталяванні.
У цяперашні час Дом дзіцяці ажыццяўляе лячэнне і рэабілітацыю 14 дзяцей-інвалідаў ва ўзросце да сямі гадоў, з іх 12 – асабліва цяжкія, таму знаходзяцца на паліятыўным назіранні спецыялістаў. У асноўным гэта дзеці з сур'ёзнымі парушэннямі цэнтральнай нервовай сістэмы, прыроджанымі паталогіямі.
У перспектыве плануецца стварыць на базе ўстановы абласны цэнтр паліятыўнай дапамогі. Тым больш неабходны вопыт, кваліфікаваны персанал, а таксама матэрыяльна-тэхнічная база для гэтага маюцца.
У цяперашні час Дом дзіцяці ажыццяўляе лячэнне і рэабілітацыю 14 дзяцей-інвалідаў ва ўзросце да сямі гадоў, з іх 12 — асабліва цяжкія.
Падводзячы вынікі акцыі «Дай пяць дабру!», намеснік старшыні Беларускага фонду міру, вядомы бізнесмен Андрэй Балабін паведаміў, што за тры гады сабрана больш за 500 тыс. рублёў, на гэтую суму аказана дапамога ўсім Дамам дзіцяці ў Беларусі. Віцебскаму дапамагаюць ужо не першы раз, раней набылі розныя сродкі медыцынскай рэабілітацыі і сучасны гульнявы вулічны комплекс для дзяцей з асаблівасцямі развіцця.
– Калі хочам жыць лепш, не трэба перакладаць усё на плечы дзяржавы. Павінны далучацца грамадскія арганізацыі, бізнес, асабліва ў тых сферах жыцця, дзе патрэбна агульная дапамога. І дадзеная акцыя – прыклад такой сацыяльнай адказнасці і кансалідацыі. Ініцыятыва добрая яшчэ тым, што яе падтрымалі звычайныя грамадзяне, якія таксама хочуць унесці свой уклад у дапамогу дзецям. Таму плануем працягнуць акцыю, – сказаў старшыня БФМ Максім Місько.
Дарэчы, менавіта ў Віцебск арганізатары праекта прыязджаюць ужо чацвёрты раз, што таксама невыпадкова – абласное аддзяленне Беларускага фонду міру з'яўляецца адным з лепшых у рэспубліцы.