Артисты віцебскага Коласаўскага тэатра атрымалі 4 узнагароды на міжнародным фестывалі LUDI

Артисты Віцебскага Нацыянальнага акадэмічнага драматычнага тэатра імя Якуба Коласа атрымалі адразу чатыры ўзнагароды на VI Міжнародным фестывалі камерных і монаспектакляў LUDI за пастаноўку "Пахавайце мяне за плінтусам", паведаміў літаратурны рэдактар тэатра Юрый Іваноўскі.

Коласаўцы з вялікім поспехам паказалі сваю трагікамедыю па аўтабіяграфічнай аповесці Паўла Санаева на фестывалі ў расійскім горадзе Арлоў. За пастаноўку заслужанага дзеяча мастацтваў Рэспублікі Беларусь Валерыя Анісенкі аднадушна "прагаласавалі" і гледачы 10-хвіліннымі апладысментамі, і журы сваімі ацэнкамі. Лаўрэатам фестывалю ў намінацыі "Лепшая жаночая роля" за ролю Бабулі прызнана заслужаная артыстка Беларусі, вядучы майстар сцэны, загадчыца трупай тэатра Тамара Скворцова. Спецыяльнымі прызамі журы адзначаны: у намінацыі "Лепшая мужчынская роля другога плана" за ролю Дзеда - вядучы майстар сцэны Пётр Ламан, у намінацыі "Надзея сцэны" за ролю Сашы Савельева - артыст Раман Салаўёў. Акрамя таго, па версіі моладзевага журы, дыпломам лаўрэата ў намінацыі "Лепшая праца мастака" ўзнагароджаны мастак-пастаноўшчык спектакля Андрэй Жыгур. Народны фестываль камерных і монаспектакляў LUDI (у перакладзе з латыні - гульні) прайшоў 1-7 чэрвеня. За шэсць гадоў праведзены велізарны шлях ад сустрэчы добрых сяброў трох краін - Расіі, Украіны і Беларусі ў 2010 годзе да з'явы міжнароднага маштабу.

Сёлета ў фестывальнай афішы былі прадстаўлены камерныя і монаспектаклі артыстаў з 8 гарадоў Расіі, а таксама з Ізраіля, Грэцыі, Італіі, Польшчы, Літвы, Украіны, Беларусі, Малдовы. Прафесійнае журы склалі вядомыя дзеячы тэатральнага мастацтва - акцёры і рэжысёры, мастацтвазнаўцы, тэатразнаўцы, драматургі, прадстаўнікі міжнародных і грамадскіх арганізацый з Расіі, Літвы, Арменіі і Германіі.

Кацярына Князева – БЕЛТА.