Першы беларускі аўтамабіль хуткай дапамогі папоўніў аўтапарк сістэмы аховы здароўя Віцебскай вобласці

14 ліпеня, Віцебск /Сяргей Кочатаў - БЕЛТА/. Аўтапарк сістэмы аховы здароўя Віцебскай вобласці папоўніў першы айчынны аўтамабіль хуткай медыцынскай дапамогі, выраблены рэзідэнтам СЭЗ "Віцебск" СААТ "Грандзіскар". Такі падарунак віцебскім медыкам у гонар 20-годдзя міжнароднага фестывалю "Славянскі базар у Віцебску" зрабіла беларуска-расійскае СП. Пра гэта паведаміў сёння на цырымоніі перадачы машыны дырэктар "Грандзіскара" Юрый Любімаў, перадае карэспандэнт БЕЛТА.

Машына хуткай дапамогі, створаная на базе шасі "Форд Транзіт", выканана ў якасці трасавага аўтамабіля для перавозкі цяжкіх хворых на далёкія адлегласці. Яе камплектацыя прадугледжвае наяўнасць на борце вялікага запасу кіслароду, а таксама магчымасць аснашчэння любым неабходным абсталяваннем. Аўтамабіль валодае адной з важных характарыстык для такога роду машын - камфортнасць як для медыцынскага персаналу, так і для пацыентаў.

"Перадача хуткай дапамогі ў дар ахове здароўя Віцебскай вобласці яшчэ раз падкрэслівае зацікаўленасць і сур'ёзнасць намераў заснавальнікаў "Грандзіскара" па развіцці бізнесу ў Беларусі і рэалізацыі інвестпраектаў у Віцебскай вобласці", - сказаў Юрый Любімаў.

Сёння ў службе хуткай дапамогі Віцебскай вобласці выкарыстоўваецца 165 аўтамабіляў, з іх каля 80% машын УАЗ, якія па ўзроўні камфорту маральна састарэлі. Па словах галоўнага пазаштатнага спецыяліста па хуткай дапамозе ўпраўлення аховы здароўя аблвыканкама Віктара Гамонава, у цэлым для абласной службы хуткай дапамогі актуальнай з'яўляецца неабходнасць абнаўлення аўтапарка. "Сёння сучасны аснашчаны рэанімабіль дазваляе за 1-1,5 гадзіны даставіць хворага з любой аддаленай кропкі вобласці ў высокаспецыялізаванае аддзяленне медыцынскай установы", - адзначыў Віктар Гамонаў.

Інвестыцыйны праект СТАА "Грандзіскар" прадугледжвае стварэнне вытворчасці аўтатранспарту спецыяльнага прызначэння гадавой магутнасцю да 5 тыс. машын на адной з пляцовак СЭЗ "Віцебск" у абласным цэнтры. На гэтыя мэты беларуска-расійскі тандэм заснавальнікаў плануе інвеставаць каля $15 млн. на працягу пяці гадоў. Інвестары арганізавалі вытворчасць спецтэхнікі на арандаваных плошчах. Паралельна плануецца пабудаваць уласны завод агульнай плошчай каля 5 тыс. кв.м, якія мяркуецца ўвесці ў эксплуатацыю да канца 2012 года.

У аснове вытворчага працэсу выкарыстоўваецца тэхналогія буйнавузлавой зборкі розных мадыфікацый аўтасалонаў. У вытворчым партфелі "Грандзіскара" выпуск аўтамабіляў хуткай меддапамогі, спецаўтатэхнікі для сілавых структур, мікрааўтобусаў і шэраг іншых камплектацый на базе шасі "Фальксваген", "Форд", а ў перспектыве шэрагу іншых замежных і беларускіх аўтамабільных брэндаў. У 2011 годзе "Грандзіскар" разлічвае выпусціць каля 300 аўтамабіляў у асноўным для беларускіх заказчыкаў. Акрамя Беларусі, прадпрыемства мае намер выйсці на расійскі і рынкі краін СНД.-0-