Барды-святары і духоўныя песні ў стылі этна. Фестываль «Адыгітрыя» прайшоў на Віцебшчыне

XII міжнародны моладзевы праваслаўны фестываль «Адыгітрыя» завяршыўся днямі на Віцебшчыне. Унікальнасць яго складаецца ў спалучэнні культурных і духоўных мерапрыемстваў. Боскія літургіі папярэднічаюць выступленні конкурсантаў на сцэне і майстар-класы па пляценні паясоў або ляпцы з гліны, а адразу пасля фаер-шоў маладыя людзі адпраўляюцца ў храм. Удзельнікі ўжо даўно паміж сабой называюць «Адыгітрыю» фестывалем, на якім пануе любоў.

Музычны конкурс — цэнтральная падзея праваслаўнага форуму, але спаборніцкі дух адсутнічае. Выканаўцы падтрымліваюць адзін аднаго, шчыра спачуваюць. Гэта адзначыла і журы, у склад якога ўваходзілі Тамара Краснава-Гусачэнка — старшыня Віцебскага абласнога аддзялення Саюза пісьменнікаў Беларусі; Сяргей Грэбеннікаў — вядомы расійскі паэт, спявак і кампазітар; Віталь Рауза — музыкант, арганізатар калядных харавых мерапрыемстваў у абласным цэнтры; манах Задонскага манастыра Лаўрэнцій; дыякан Сергій Учанейшвілі, клірык Аляксандра-Неўскай лаўры, і Наталля Купрыянава — праваслаўная спявачка, аўтар-выканаўца. Яна, дарэчы, раней удзельнічала ў «Адыгітрыі» ў якасці выканаўцы і атрымала Гран-пры фестывалю. На цырымоніі ўрачыстага адкрыцця Наталля пажадала ўсім удзельнікам:

— Няхай ваша любоў да праваслаўнай песні будзе не проста хобі, няхай выступленне на фестывалі не стане аднаякавым. Развівайце сваю творчасць! Спявайце не толькі голасам, спявайце душой, сэрцам.

Пазітыўны настрой на галоўных канцэртах, першы з якіх прайшоў ля сцен Свята-Успенскага кафедральнага сабора, другі — у Летнім амфітэатры, задавалі і самі канкурсанты. Практычна кожны год у Віцебск прыязджае хор «Многоголосие» храма Хрыста Збавіцеля з Новаваронежа. Самыя юныя яго ўдзельнікі Ілья Бокаў і Аляксандра Ларына ў вобразе маленькіх анёлачкаў заваявалі абсалютна ўсіх гледачоў (на фота).

Духоўная музыка можа быць самай рознай: са сцэны гучалі песні пра Бога і веру ў выкананні як бардаў-свяшчэннаслужыцеляў, так і выканаўцаў этнамузыкі.

Каларытным стала выступленне казачага ансамбля «Ермак» з Калінінграда, творчую падтрымку яму аказаў харэаграфічны калектыў з Варонежскай вобласці. Філігранна арудавалі шаблямі і шашкамі юныя і дасведчаныя казакі ў такт традыцыйнай «удалой» песні. «Ермакі» ўпершыню пабывалі ў Віцебску, але адразу адчулі добразычлівае стаўленне і «аблегчылі» працу журы:

— Усе канкурсанты ўжо выйгралі толькі таму, што яны тут і яны разам, — рэзюмаваў самы дасведчаны ўдзельнік калектыву Аляксандр Матвіенка.

Дарэчы, пра вынікі. Гран-пры XII фестывалю «Адыгітрыя» атрымалі аўтар-выканаўца Дзмітрый Шаўчэнка (Белгародская вобласць) і спявачка Наталля Маскаленка (Варонеж) .

Культурная праграма моладзевага форуму не абмяжоўвалася толькі конкурснай часткай, шматлікія фестывальныя мерапрыемствы праходзілі ў праваслаўным лагеры «Дружба» на беразе Бярнскага возера, недалёка ад аг. Вароны ў Віцебскім раёне. Самым яркім з іх стаў вечар харэаграфіі. Маладыя людзі на праваслаўным балу выконвалі сярэднявечныя, народныя і гісторыка-бытавыя танцы.

Сёння з праваслаўнага лагера вернікі адправяцца ў хрэсны ход да цудатворнай іконы Божай Маці «Адыгітрыя» па маршруце Віцебск — Смаленск.

Наталля Камлёва,"Віцебскія весці"