Базавая арэндная велічыня ў Беларусі з 1 красавіка складзе Br54 тыс.

29 сакавіка, Мінск /Кар. БЕЛТА/. Базавая арэндная велічыня ў Беларусі з 1 красавіка складзе Br54 тыс. Адпаведны ўказ №150 "Аб некаторых пытаннях арэнды і бязвыплатнага карыстання маёмасцю" Прэзідэнт Беларусі Аляксандр Лукашэнка падпісаў 29 сакавіка, паведамілі БЕЛТА ў прэс-службе кіраўніка дзяржавы. Дакументам удасканальваецца парадак вызначэння памеру арэнднай платы па аб'ектах нерухомасці, якая будзе вызначацца з улікам базавай арэнднай велічыні. У далейшым памер базавай арэнднай велічыні будзе штогод устанаўлівацца Саветам Міністраў з улікам гадавога ўзроўню інфляцыі (індэкса спажывецкіх цэн за папярэдні год у адносінах да папярэдняга) і прымяняцца з 1 красавіка бягучага года. Такім чынам, ствараецца зразумелы і прадказальны механізм змянення арэнднай платы за здаваную ў арэнду нерухомасць, растлумачылі ў прэс-службе. Індэкс спажывецкіх цэн за 2011 год у параўнанні з 2010 годам склаў 153,2%. У сувязі з гэтым базавая арэндная велічыня разлічваецца як твор базавай стаўкі, што дзейнічала ў 2011 годзе, і індэкса спажывецкіх цэн (35 000 х 153,2% = 53 620 ( 54 000). Указам таксама адмяняецца дзяржаўнае рэгуляванне памеру арэнднай платы за гандлёвыя месцы на рынках і ў гандлёвых цэнтрах, якія знаходзяцца ў прыватнай уласнасці. Фарміраванне арэнднай платы за такія гандлёвыя месцы будзе ажыццяўляцца ў адпаведнасці з нормамі Грамадзянскага кодэкса па пагадненні бакоў. Дакументам вызначаецца, што ажыццяўленне арандатарам неаддзельных паляпшэнняў арандаванай нерухомай маёмасці не будзе з'яўляцца падставай для павелічэння памеру арэнднай платы. Гэта забяспечыць абарону арандатараў ад росту арэнднай платы ў сувязі з праведзенымі імі паляпшэннямі маёмасці. З улікам практыкі прымянення ўказа ад 23 кастрычніка 2009 года №518 "Аб некаторых пытаннях арэнды і бязвыплатнага карыстання маёмасцю" удакладняюцца арганізацыі, якія пералічваюць атрыманыя ад здачы ў арэнду сродкі ў рэспубліканскі бюджэт, а таксама памер такіх пералічэнняў. Акрамя таго, ва ўказе прапісаны юрыдычныя асобы, якім маёмасць прадастаўлена ў бязвыплатнае карыстанне.-0-