Беларусь і Іран рэалізуюць сумесныя праекты ў 15 галінах

26 сакавіка, Віцебск /Вольга Багачова - БЕЛТА/. Беларусь і Іран у адпаведнасці з падпісанымі пагадненнямі рэалізуюць праекты ў 15 галінах. Аб гэтым паведаміў сёння Надзвычайны і Паўнамоцны Пасол Ісламскай Рэспублікі Іран у Беларусі Сеід Абдолла Хасейні на сустрэчы са старшынёй Віцебскага аблвыканкама Аляксандрам Касінцам, перадае карэспандэнт БЕЛТА. "Цяпер краіны рэалізуюць праекты на $1 млрд. Рыхтуецца дакументацыя па іншых пагадненнях на суму каля $2 млрд., якія неўзабаве паэтапна пачнуць працаваць", - сказаў дыпламат. Сумесныя праекты Беларусь і Іран маюць намер рэалізаваць у сферы гандлю, машынабудавання, банкаўскай, аграпрамысловым комплексе, будаўнічай, культурнай, адукацыйнай і іншых сферах. "Шмат праектаў звязана з нафтавай галіной. Пры гэтым частка з іх плануецца ажыццявіць у Віцебскай вобласці", - распавёў Сеід Абдолла Хасейні. Ён адзначыў, што палітычныя адносіны Беларусі і Ірана знаходзяцца на найвышэйшым узроўні, а вось эканамічныя, на жаль, "пакуль гэтай вышыні не адпавядаюць". На думку дыпламата, гэта абумоўлена нізкай дасведчанасцю бізнесменаў і ў цэлым насельніцтва аб краінах. Пацвярджаюць гэта і праведзеныя даследаванні, у якіх удзельнічалі каля 3 тыс. беларусаў рознага ўзросту і 1,1 тыс. іранскіх бізнесменаў. Згодна з данымі апытання, 80% прадстаўнікоў бізнесу Ірана не маюць якіх-небудзь звестак аб магчымасцях працы ў Беларусі, а 90% апытаных жыхароў Беларусі валодаюць мінімальнай інфармацыяй аб сучасным Іране. "Выправіць сітуацыю дапаможа ўсталяванне пабрацімскіх сувязяў паміж рэгіёнамі, наладжванне прамых кантактаў паміж кампаніямі", - упэўнены пасол. Тавараабарот Беларусі і Ірана ў 2009 годзе дасягнуў $93,8 млн. Беларусь экспартавала ў Іран сінтэтычныя валокны, металапрадукцыю, грузавыя аўтамабілі, трактары, калійныя ўгнаенні і іншую прадукцыю. З Ірана пастаўляліся камплектуючыя да легкавых аўтамабіляў і садавіна. Аб'ём іранскіх інвестыцый на капітальнае будаўніцтва ў Беларусі ў 2009 годзе склаў $3,9 млн.-0-