Беларусь пачынае эканамічны ўздым - А.Лукашэнка

20 красавіка, Мінск /Кар. БЕЛТА/. Беларусь пачынае эканамічны ўздым. Аб гэтым заявіў сёння Прэзідэнт Беларусі Аляксандр Лукашэнка ў Пасланні беларускаму народу і Нацыянальнаму сходу, перадае карэспандэнт БЕЛТА. Як адзначыў Аляксандр Лукашэнка, Беларусь можна аднесці да тых нямногіх краін у свеце, якія здолелі дабіцца ў крызісным 2009 годзе росту ВУП. У Беларусі былі аператыўна прыняты меры па мінімізацыі негатыўных наступстваў крызісу, умацаванні банкаўскай сістэмы і недапушчэнні разгулу спекулятыўнага капіталу, стымуляванні экспарцёраў і таваравытворцаў, лібералізацыі ўмоў гаспадарчай дзейнасці. Таму не дапусцілі падзення вытворчасці валавога ўнутранага прадукту, падкрэсліў Прэзідэнт. "Своечасовасць і правільнасць нашых дзеянняў не толькі ў апошнія некалькі гадоў, але і ў цэлым збалансаванасць беларускай мадэлі сацыяльна-эканамічнага развіцця пацверджаны міжнароднымі экспертамі, - адзначыў Аляксандр Лукашэнка. - Сусветны банк і Міжнародны валютны фонд, ацэнкі якіх заўсёды адрозніваліся скептыцызмам у адносінах да Беларусі, былі вымушаны прызнаць, што стадыю рэцэсіі Беларусь ужо прайшла. І краіна пачынае ўздым". Ён таксама адзначыў, што ў першым квартале 2010 года ўжо атрымана каля 5% росту, а да канца года ён павінен дасягнуць як мінімум 11%. Як падкрэсліў Прэзідэнт, у няпростых умовах у Беларусі ўдалося захаваць вытворчасць і не страціць навуковы і кадравы патэнцыял. Не было дапушчана масавых звальненняў, як гэта было практычна ва ўсіх еўрапейскіх краінах і ЗША. Не скарачаліся ў Беларусі сацыяльныя выдаткі, не згортваліся найважнейшыя дзяржпраграмы. "Насельніцтва не адчувала і не адчувае праблем з забеспячэннем цяплом, электраэнергіяй, палівам, харчаваннем. У выніку нам удалося зберагчы галоўнае - давер людзей, грамадзянскі мір і спакой у грамадстве, - сказаў Аляксандр Лукашэнка. - Аднак не хачу, каб склалася ўражанне, быццам у нас суцэльная ідылія. Праблем дастаткова. І, на жаль, суб'ектыўных, т. е. у поўнай меры залежных ад нас, не менш, чым аб'ектыўных". Па многіх напрамках працу ўрада, Нацыянальнага банка, мясцовай улады, кіраўнікоў вядучых прадпрыемстваў нельга прызнаць здавальняючай, падкрэсліў ён. Па словах кіраўніка дзяржавы, ва ўмовах сусветнай узаемазалежнасці і адкрытасці сваёй эканомікі Беларусь не магла не адчуць негатыўнага ўплыву крызісу. У 2009 годзе экспарт і прамысловая вытворчасць упершыню за апошнія гады мелі адмоўную дынаміку. У той жа час краіна здолела захаваць макраэканамічную стабільнасць і нават забяспечыць прырост па такіх пазіцыях, як інвестыцыі ў асноўны капітал, жыллёвае будаўніцтва, сельскагаспадарчая вытворчасць і рознічны тавараабарот. У ліку прычын глабальнага крызісу беларускі лідар назваў сацыяльную неадпаведнасць у вядзенні бізнесу, імкненне да ўзбагачэння любым шляхам. "Цяпер свету патрэбна такая эканоміка, якая не падвяргае небяспецы будучыню ўсіх ва ўгоду эгаізму і карысталюбства некаторых, - падкрэсліў Прэзідэнт Беларусі. - Патрэбна эканоміка, якая не адварочваецца ад маралі, не вырашае праблемы шляхам нячыстаплотных змоваў і карупцыйных сувязяў, на шкоду жыццядзейнасці дзяржавы і грамадства". -0-