Беларусь імкнецца развіваць збалансаванае і канструктыўнае ўзаемадзеянне з партнёрамі з розных рэгіёнаў свету - А.Лукашэнка

14 чэрвеня, Мінск /Кар. БЕЛТА/. Рэспубліка Беларусь імкнецца развіваць збалансаванае і канструктыўнае ўзаемадзеянне з партнёрамі з розных рэгіёнаў свету. Аб гэтым сёння на цырымоніі ўручэння даверчых грамат пасламі шэрагу дзяржаў заявіў Прэзідэнт Беларусі Аляксандр Лукашэнка, паведамілі БЕЛТА ў прэс-службе беларускага лідара. Даверчыя граматы Прэзідэнту ўручылі кіраўнікі дыпламатычных місій Арменіі, Грузіі, Ірака і Украіны ў Беларусі, а таксама паслы Аўстрыі, Албаніі, Бангладэш, Егіпта, Марока, Манголіі, Амана і Партугаліі, якія працуюць у Расійскай Федэрацыі і нашай краіне па сумяшчальніцтве. "Мы зацікаўлены ва ўдасканаленні доступу беларускіх тавараў на традыцыйныя і новыя рынкі, прыцягненні з-за мяжы сучасных тэхналогій і інвестыцый, дыверсіфікацыі каналаў паставак сыравіны і энергетычных рэсурсаў", - сказаў кіраўнік дзяржавы. Аляксандр Лукашэнка адзначыў, што паколькі беларуская эканоміка з'яўляецца адкрытай і экспартаарыентаванай, то прыярытэтам для рэспублікі ў міжнародных адносінах з'яўляюцца гандлёва-эканамічныя пытанні. Геапалітычнае становішча і гісторыка-культурныя асаблівасці нашай дзяржавы прадугледжваюць збалансаванае і канструктыўнае ўзаемадзеянне з мноствам партнёраў у розных рэгіёнах свету. Беларусь, нягледзячы на тое, што з'яўляецца адным з сузаснавальнікаў ААН, яшчэ вельмі маладая суверэнная дзяржава. У той жа час яна ўжо заявіла аб сабе як аб сур'ёзным і адказным удзельніку міжнароднай супольнасці, актыўна ўцягнутым у вырашэнне вострых праблем сусветнага парадку дня. "У межах ААН мы ініцыявалі распрацоўку глабальнага плана па процідзеянні гандлю людзьмі, дынамічна праводзім лінію на забеспячэнне раўнапраўнага доступу ўсіх краін да тэхналогій вытворчасці энергіі з новых і аднаўляльных крыніц", - сказаў Прэзідэнт. Паводле слоў кіраўніка дзяржавы, Беларусь зацікаўлена ў далейшым умацаванні супрацоўніцтва з даўно ўсталяванымі партнёрамі ў рэгіёне былога Савецкага Саюза. "Адносіны з Украінай апошнім часам набылі сапраўды стратэгічны характар", - канстатаваў Аляксандр Лукашэнка. Беларуска-ўкраінскае супрацоўніцтва ўключае шырокі і разнастайны пералік пытанняў і задач. На ўзроўні кіраўнікоў дзвюх дзяржаў дасягнуты цэлы шэраг ключавых дамоўленасцей, найхутчэйшая рэалізацыя якіх надасць дадатковы імпульс сацыяльна-эканамічнаму развіццю абедзвюх краін. Ужо падчас нефармальнай размовы з Надзвычайным і Паўнамоцным Паслом Украіны ў Беларусі Раманам Бяссмертным Прэзідэнт Беларусі папрасіў дыпламата перадаць самыя добрыя пажаданні кіраўніку Украіны. "Мы працягваем рэалізацыю таго, аб чым дамовіліся раней", - сказаў Аляксандр Лукашэнка. Прымаючы даверчыя граматы Надзвычайнага і Паўнамоцнага Пасла Арменіі ў Беларусі Армена Хачатряна, Прэзідэнт адзначыў цесныя і сяброўскія адносіны, якія склаліся ў Беларусі з Арменіяй. Паводле яго слоў, наша рэспубліка адкрыта для новых ініцыятыў, якія дазваляюць нарошчваць гандлёва-эканамічнае ўзаемадзеянне, умацоўваць культурныя і гуманітарныя сувязі з гэтай брацкай і сяброўскай дзяржавай. Беларусы таксама заўсёды з павагай ставіліся да працоўнага народа Грузіі, яго старажытнай гісторыі і найбагацейшых традыцый. "Узаемная цікавасць, натуральнае жаданне выкарыстоўваць наяўныя ў нас магчымасці стануць магутнымі стымуламі для пашырэння двухбаковага супрацоўніцтва не толькі ў эканамічнай сферы, але і ў галіне адукацыі, культуры, спорту, турызму і іншых галінах", - дадаў Аляксандр Лукашэнка. Ён таксама падзякаваў Грузіі ў асобе Надзвычайнага і Паўнамоцнага Пасла гэтай краіны ў Беларусі Георгія Чхеідзэ за падтрымку на мінулым у Осла песенным конкурсе "Еўрабачанне-2010" (Грузія прысудзіла беларускім удзельнікам найвышэйшую ацэнку - 12 балаў). Беларусь, з'яўляючыся неад'емнай часткай Еўропы, таксама імкнецца выбудоўваць стабільныя і канструктыўныя адносіны з еўрапейскімі дзяржавамі і ЕС у цэлым. У прыватнасці, кіраўнік дзяржавы адзначыў пазітыўную дынаміку беларуска-аўстрыйскага дыялогу. "Мы высока цэнім ролю Аўстрыі ў развіцці інвестыцыйнага супрацоўніцтва з Беларуссю. Думаю, што нам пара прыступаць да рэалізацыі больш маштабных супольных эканамічных праектаў", - адзначыў Прэзідэнт, прымаючы даверчыя граматы Надзвычайнага і Паўнамоцнага Пасла Аўстрыйскай Рэспублікі ў Расіі і ў Беларусі (па сумяшчальніцтве) Маргот Клесціль-Лёфлер. "У якасці важнага і перспектыўнага партнёра ў Еўрапейскім саюзе, узаемадзеянне з якім мае вялікі невыкарыстаны патэнцыял, мы разглядаем Партугалію", - сказаў кіраўнік дзяржавы, прымаючы даверчыя граматы Надзвычайнага і Паўнамоцнага Пасла Партугальскай Рэспублікі ў Расіі і ў Беларусі (па сумяшчальніцтве) Педру Нуну дэ Абрэу і Мелу Бартолу. На думку Прэзідэнта, у найбліжэйшай будучыні дзвюм краінам неабходна наладзіць паўнавартасны палітычны дыялог і актывізаваць узаемадзеянне па напрамках, якія прадстаўляюць узаемную цікавасць. Аляксандр Лукашэнка, прымаючы даверчыя граматы Надзвычайнага і Паўнамоцнага Пасла Рэспублікі Албанія ў Расіі і ў Беларусі (па сумяшчальніцтве) Сокала Гіёкі, адзначыў: "Беларусь вельмі зацікаўлена ва ўсталяванні больш цесных кантактаў з Рэспублікай Албанія ў гандлёва-эканамічнай сферы, у галіне навукі, культуры і турызму". Акрамя таго, Беларусь надае асаблівае значэнне партнёрскім адносінам з краінамі Азіі, Афрыкі і Блізкага Усходу. Кіраўнік беларускай дзяржавы, прымаючы даверчыя граматы Надзвычайнага і Паўнамоцнага Пасла Султаната Аман у Расіі і Беларусі (па сумяшчальніцтве) Махамеда Авада Аль-Хасана, падкрэсліў: "Мы вельмі рады сяброўскім сувязям, якія склаліся з Аманам. Канструктыўны і адкрыты дыялог на вышэйшым узроўні дазваляе нам рэалізоўваць самыя смелыя маштабныя супольныя праекты". Беларускі лідар адзначыў неабходнасць надання большага дынамізму кантактам з Манголіяй, жыхары якой даўно, яшчэ з часоў Савецкага Саюза, ведаюць Беларусь, яе прадукцыю і тэхналагічныя магчымасці. Аб гэтым беларускі лідар сказаў, прымаючы даверчыя граматы кіраўніка мангольскай дыпламатычнай місіі ў Расіі і Беларусі (па сумяшчальніцтве) Далоонджынгійна Ідэўхтэна. Прымаючы даверчыя граматы пасла Бангладэш у Расіі і Беларусі (па сумяшчальніцтве) Сайфула Хока, кіраўнік дзяржавы падкрэсліў добры ўзровень узаемадзеяння Беларусі ў міжнародных арганізацыях, перш за ўсё ў ААН, з Народнай Рэспублікай Бангладэш. Аляксандр Лукашэнка выказаў надзею на паглыбленне і пашырэнне кантактаў з гэтай краінай, у тым ліку ў гандлёва-эканамічнай галіне і ў сферы адукацыі. "Беларусь высока цэніць традыцыйна сяброўскія адносіны з Егіптам, прывітае актыўную і канструктыўную працу гэтай краіны на пасадзе старшыні Руху недалучэння, а таксама разлічвае на далейшае развіццё цесных гандлёва-эканамічных адносін", - сказаў Аляксандр Лукашэнка, прымаючы даверчыя граматы Надзвычайнага і Паўнамоцнага Пасла Арабскай Рэспублікі Егіпет у Расіі і Беларусі (па сумяшчальніцтве) Махамеда Алы Эльдына Алі Шаукі Эльхадзідзі. Беларусь паслядоўна выступала і выступае за найхутчэйшы вывад замежных войскаў з Ірака, захаванне адзінства і тэрытарыяльнай цэласнасці дзяржавы і гатова прыняць актыўны ўдзел у аднаўленні і будаўніцтве інфраструктуры, жылых дамоў і прамысловых аб'ектаў у гэтай краіне. Аб гэтым заявіў Прэзідэнт Беларусі, прымаючы даверчыя граматы Надзвычайнага і Паўнамоцнага Пасла Рэспублікі Ірак у Рэспубліцы Беларусь Хайдара Мансура Хадзі Авіса. "Думаю, што прыйшоў час аднавіць і істотна актывізаваць нашы гандлёва-эканамічныя адносіны", - падкрэсліў кіраўнік беларускай дзяржавы. Аляксандр Лукашэнка выказаў упэўненасць, што беларуская тэхніка і іншыя тавары будуць запатрабаваны ў Іраку. Прэзідэнт Беларусі таксама выказаў надзею на пашырэнне ўзаемавыгадных сувязей з Марока, актывізацыю ўсяго спектру беларуска-мараканскіх адносін. На гэтым ён акцэнтаваў увагу, прымаючы даверчыя граматы Надзвычайнага і Паўнамоцнага Пасла Каралеўства Марока ў Расіі і Беларусі (па сумяшчальніцтве) Абдэлькадэра Лешэхеба. Аляксандр Лукашэнка разлічвае, што актыўнасць, ініцыятыўнасць і аб'ектыўнасць, якія дыпламаты праявяць, працуючы ў Беларусі, прывядуць да адчувальных практычных вынікаў, дазволяць дасягнуць новых вышынь у двухбаковым супрацо