Кардыяхірургія Беларусі павінна выйсці на ўзровень 7 тыс. аперацый у год - эксперт
17 снежня, Віцебск /Сяргей Кочатаў - БЕЛТА/. Беларуская кардыяхірургія мае патэнцыял для таго, каб праводзіць у год да 7 тыс. аперацый на сэрцы. Пра гэта паведаміў сёння журналістам загадчык лабараторыяй хірургіі сэрца РНПЦ "Кардыялогія", галоўны пазаштатны кардыяхірург Міністэрства аховы здароўя Беларусі доктар медыцынскіх навук, прафесар Юрый Астроўскі. Ён прымае ўдзел у першай рэспубліканскай навукова-практычнай канферэнцыі кардыяхірургаў і таракальных хірургаў у Віцебску, перадае карэспандэнт БЕЛТА.
За апошнія два гады ў Беларусі праведзена вялікая праца па развіцці кардыяхірургічнай службы, у прыватнасці створаны кардыяхірургічныя аддзяленні ва ўсіх абласных бальніцах. У 2009 годзе праведзена каля 500 аперацый на сэрцы, але гэта толькі пачатак, упэўнены Юрый Астроўскі. "У перспектыве мы павінны выйсці на ўзровень да 7 тыс. аперацый у год, што дазволіць скараціць ліст чакання пацыентаў да мінімальнай мяжы - да трох месяцаў", - лічыць ён. Сёння ліст чакання складае ад шасці месяцаў да года ў залежнасці ад рэгіёна.
Рост колькасці аперацый дазваляе павышаць узровень даступнасці кардыяхірургічнай дапамогі для насельніцтва. Айчынныя спецыялісты маюць магчымасць аказваць такую дапамогу ва ўсіх рэгіёнах краіны, і гэта самае вялікае дасягненне ў развіцці кардыяхірургіі апошніх гадоў, падкрэсліў Юрый Астроўскі. Акрамя таго, у 2009 годзе ў Беларусі выканана 11 аперацый па трансплантацыі сэрца. Гэта дае права гаварыць аб тым, што ў рэспубліцы выконваюцца ўсе віды кардыялагічнай дапамогі, у тым ліку высокатэхналагічнай, што выводзіць краіну на ўзровень еўрапейскіх краін па гэтым напрамку медыцыны, адзначыў вучоны.-0-