Беларускія прамысловыя прадпрыемствы не адчуваюць праблем з разгрузкай складскіх запасаў

23 чэрвеня, Мінск /Вольга Беляўская – БЕЛТА/. Беларускія прамысловыя прадпрыемствы не адчуваюць праблем з разгрузкай складскіх запасаў, заявіў сёння журналістам у Мінску, адказваючы на пытанне карэспандэнта БЕЛТА, намеснік міністра прамысловасці Анатоль Маісейчык. "Праблемы былі ў той час, калі быў крызіс, – канстатаваў намеснік міністра. – Сёння назіраецца станоўчая тэндэнцыя. Тыя складскія запасы, якія ёсць, прадыктаваны патрэбамі рынку". Па словах Анатоля Маісейчыка, беларускія прадпрыемствы шукаюць новыя магчымасці рэалізацыі сваёй прадукцыі на знешніх рынках, прыцягнення інвестыцый у новыя праекты. "Беларусь мае выгаднае геаграфічнае становішча і выгаднае становішча для паспяховай рэалізацыі такіх праектаў, прыцягнення інвестараў", – лічыць ён. У якасці прыкладу ён прывёў сумесную вытворчасць "Мідеа-Гарызонт". Па словах Анатоля Маісейчыка, гэты праект будзе цалкам падтрымлівацца як Мінпрамам, так і кіраўніцтвам краіны. У сваю чаргу генеральны дырэктар ААТ "Гарызонт" Юрый Прэдка адзначыў, што сёння ў Мінску праходзіць прэзентацыя сумеснай беларуска-кітайскай вытворчасці па выпуску мікрахвалевых печаў. На мерапрыемстве прысутнічаюць прадстаўнікі буйных гандлёвых сетак Расіі, Украіны, Казахстана, Узбекістана, Грузіі і г.д. "Галоўная задача мерапрыемства – пазнаёміць міжнародных экспертаў з нашымі тэхналогіямі і сфарміраваць пакет заказаў на наступны год і на наступную пяцігодку", – распавёў гендырэктар "Гарызонта".-0-