Беларускія спартсмены на Х зімовых Параалімпійскіх гульнях у Канадзе заваявалі 9 медалёў

22 сакавіка, Мінск /Сяргей Вішнеўскі - БЕЛТА/. Беларускія спартсмены заваявалі 9 медалёў на Х зімовых Паралімпійскіх гульнях, якія прайшлі з 12 па 21 сакавіка ў канадскіх Ванкуверы і Уістлеры, паведамляе карэспандэнт БЕЛТА. У заключны дзень дзявятую ўзнагароду беларускай камандзе прынесла Людміла Воўчак, якая заваявала бронзу ў фінале лыжнай спрынтарскай гонкі на 1 км сярод спартсменак з парушэннямі апорна-рухальнага апарату (3 мін.01,9 сек.). Золата выйграла італьянка Франчэска Порчэлато (2 мін.58,5 сек.), срэбра дасталася ўкраінцы Алёне Юркоўскай (3 мін.00 сек.). У фінал спрынтарскай гонкі на 1 км для спартсменак з парушэннямі апорна-рухальнага апарату прабілася таксама беларуска Ларыса Ворана, якая заняла 4-е месца (4 мін.34,5 сек.). Золата тут заваявала ўкраінка Аляксандра Конанава (4 мін.21,4 сек.), срэбра - японка Сёка Ота (4 мін.26,8 сек.), бронзу - расіянка Ганна Бурмістрава (4 мін.31,3 сек.). У медальным заліку Паралімпіяды Беларусь з 9 узнагародамі (2 золата, 7 бронзавых узнагарод) заняла 9-е месца, па агульнай колькасці прызавых месцаў паўтарыўшы рэкордны вынік Турына-2006 (1 залаты, 6 срэбраных, 2 бронзавыя медалі). Па колькасці залатых медалёў Гульні ў Канадзе сталі для беларускай каманды рэкорднымі. Прычым абодва золата на рахунку капітана нашай дружыны Людмілы Воўчак - у лыжных гонках на дыстанцыях 10 км і 5 км сярод спартсменак з парушэннямі апорна-рухальнага апарату. У актыве Людмілы Воўчак таксама дзве бронзы - у спрынце на 1 км і ў лыжнай жаночай эстафеце 3х2,5 км, дзе разам з ёй гэты медаль здабывалі Ларыса Ворана і Ядвіга Скарабагатая. Бронзавымі прызёркамі таксама станавіліся Васіль Шапцебой у лыжнай гонцы вольным стылем на 20 км сярод слабавідушчых спартсменаў і ў біятлоннай гонцы праследавання на 3 км, Ядвіга Скарабагатая ў 15-кіламетровай гонцы вольным стылем сярод слабавідушчых спартсменак, Дзмітрый Лобан у лыжнай гонцы на 10 км сярод спартсменаў з парушэннямі апорна-рухальнага апарату, Ларыса Ворана ў лыжнай гонцы класічным стылем на 5 км сярод спартсменак з парушэннямі апорна-рухальнага апарату. Перад пачаткам Паралімпіяды беларуская дружына разлічвала на 5 медалёў. Гэты прагноз перавыкананы. Яшчэ 6 разоў беларускія паралімпійцы спыняліся за крок ад п'едэстала, займаючы 4-е месца. Усяго ўзнагароды заваёўвалі прадстаўнікі 21 краіны: 1. Германія - 13 залатых, 5 срэбраных, 6 бронзавых (усяго 24) 2. Расія - 12, 16, 10 (38) 3. Канада - 10, 5, 4 (19) 4. Славакія - 6, 2, 3 (11) 5. Украіна - 5, 8, 6 (19) 6. ЗША - 4, 5, 4 (13) 7. Аўстрыя - 3, 4, 4 (11) 8. Японія - 3, 3, 5 (11) 9. Беларусь - 2, 0, 7 (9) 10. Францыя - 1, 4, 1 (6) 11. Італія - 1, 3, 3 (7) 12. Нарвегія - 1, 3, 2 (6) 13. Іспанія - 1, 2, 0 (3) 13. Швейцарыя - 1, 2, 0 (3) 15. Новая Зеландыя - 1, 0, 0 (1) 16. Аўстралія - 0, 1, 3 (4) 17. Фінляндыя - 0, 1, 1 (2) 18. Паўднёвая Карэя - 0, 1, 0 (1) 19. Швецыя - 0, 0, 2 (2) 20. Чэхія - 0, 0, 1 (1) 20. Польшча - 0, 0, 1 (1). Было разыграна 64 камплекты ўзнагарод у пяці відах спорту (біятлоне, лыжных гонках, горных лыжах, хакеі і керлінгу). У Паралімпіядзе прымалі ўдзел атлеты з 43 краін.-0-