Беларускія навукоўцы вывучаць азёры нацпарку "Нарачанскі"

12 сакавіка, Мінск /Вольга Беляўская - БЕЛТА/. Беларускія навукоўцы вывучаць стан вадаёмаў унікальнага прыроднага комплексу "Блакітныя азёры", размешчанага на тэрыторыі нацыянальнага парку "Нарачанскі", паведаміў карэспандэнту БЕЛТА намеснік генеральнага дырэктара па навуковай рабоце нацпарку Валерый Люштык. Праект разлічаны на два гады. У бягучым годзе спецыялісты даследуюць стан чатырох азёр - Глыблі, Глыбелькі, Мёртвага і Ячменькі. У праекце возьмуць удзел супрацоўнікі навуковага аддзела нацпарку, а таксама лабараторыі гідраэкалогіі і вучэбна-навуковага цэнтра Нарачанскай біялагічнай станцыі Белдзяржуніверсітэта. Навукоўцы ўжо прыступілі да даследаванняў. У бліжэйшы час яны ацэняць празрыстасць вады ў азёрах, звернуць увагу на кіслародны рэжым і электраправоднасць, вывучаць відавы склад і колькасць фіта- і заапланктону, вызначаць утрыманне ў вадзе зважлівых арганічных рэчываў і біягенных элементаў. Акрамя таго, будзе праведзена экспрэс-ацэнка гідраэкалагічнага стану некаторых іншых малых азёр прыроднага комплексу. "Усё гэта дасць магчымасць скласці так званую экалагічную характарыстыку для кожнага возера", - распавёў суразмоўца. У будучыні такая інфармацыя павінна легчы ў аснову дадатковых прыродаахоўных мерапрыемстваў у нацыянальным парку "Нарачанскі", у прыватнасці накіраваных на захаванне яго водных аб'ектаў. У наступным годзе даследаванні будуць працягнуты. "Арганізацыя такога праекта абумоўлена неабходнасцю ўдакладнення даных аб якасці вады ў вадаёмах нацпарку, - дадаў Валерый Люштык. - Сучаснага вывучэння стану азёр не праводзілася ўжо на працягу 20 гадоў". Нацпарк "Нарачанскі" размешчаны на тэрыторыі Мінскай, Віцебскай і Гродзенскай абласцей. Яго агульная плошча складае 97,3 тыс.га. У флоры рэгіёну сустракаецца 30 рэдкіх і знікаючых відаў раслін, занесеных у Чырвоную кнігу Беларусі. Мноства куткоў прыроды тут захавалася ў натуральным выглядзе. Адзін з іх - прыродны комплекс "Блакітныя азёры", дзе расце мяч-трава звычайная - рэдкі, знікаючы від расліны першай катэгорыі аховы. На тэрыторыі нацпарку растуць таксама дзікі гладыёлус, архідэі, еўрапейская купальніца. На Еўрапейскім кантыненце гэтыя расліны можна сустрэць вельмі рэдка.-0-