Беларуска-чэшскае СВП па сушцы малочнай сыроваткі створана ў Віцебскай вобласці

31 снежня, Віцебск /Вольга Багачова - БЕЛТА/. Беларуска-чэшскае сумес­нае прадпрыемства па сушцы малочнай сыроваткі створана ў Віцебскай вобласці, паведаміў карэспандэнту БЕЛТА намеснік генеральнага дырэктара Віцебскага канцэрна "Мяса-малочныя прадукты" Сяргей Шынелеў. Сумес­нае таварыства з абмежаванай адказнасцю "МалакоВіцебск-Мега" зарэгістравалі ААТ "Малако" (Віцебск) і чэшскае прадпрыемства "Мега". Іх долі ва ўстаўным фондзе складаюць па 50%. Дырэкцыя новага прадпрыемства ўжо сфарміравана. Вядзецца перадпраектная праца па стварэнні вытворчасці магутнасцю перапрацоўкі 500 т вадкай сыроваткі ў суткі. Сыравіна будзе пастаўляцца з Віцебскага і Аршанскага рэгіёнаў вобласці. Неабходны аб'ём інвестыцый на рэалізацыю праекта складае больш за Br60 млрд. Увесці ў строй прадпрыемства плануецца ў 2011 годзе. Яшчэ адно прадпрыемства па сушцы малочнай сыроваткі з магутнасцю перапрацоўкі 200 т у суткі ў цяперашні час ствараецца на Верхнядзвінскім масласырзаводзе. Пасля запуску гэтыя два прадпрыемствы змогуць цалкам перапрацоўваць увесь аб'ём малочнай сыроваткі ў вобласці. За студзень-лістапад бягучага года канцэрн выпусціў прадукцыі на Br1,5 трлн., або 115,4% да аналагічнага ўзроўню мінулага года. Рэнтабельнасць рэалізацыі - 3,9%. Тэмп росту экспарту за студзень-лістапад склаў 140% да $231 млн. Паказчык па энергазберажэнні - мінус 14,4%. Аб'ём інвестыцый за мінулы перыяд дасягнуў Br118 млрд. У склад канцэрна ўваходзяць чатыры мясакамбінаты і восем прадпрыемстваў малочнай галіны.-0-