Біскуп Алег Буткевіч правядзе калядную службу ў касцёле Святога Андрэя Баболі ў Полацку
Сустрэчу з журналістамі ён пачаў з узнёслых вершаў, якія праслаўляюць нараджэнне Хрыста, і дадаў: хай Віфлеемская зорка прывядзе да боскай мудрасці і любоў паселіцца ў кожным доме і кожным сэрцы.
У 2017 годзе біскуп наведаў многія раёны Віцебшчыны, пабываў у касцёлах, сустрэўся з парафіянамі. У найбліжэйшы час плануе пабываць у Глыбоцкім і Браслаўскім, адкуль ён родам.
– Мне важна пагаварыць з людзьмі, паглядзець на службу святароў, даведацца, у чым мае патрэбу той ці іншы прыход, а такіх на тэрыторыі вобласці 94, – адзначыў Алег Буткевіч.
Кіраўнік каталіцкай епархіі распавёў пра будаўніцтва новага храма ў мікрараёне Білева абласнога цэнтра, другога ў Паставах. Прасоўваецца праца па адраджэнні касцёла Святога Антонія ў Віцебску. Як падкрэсліў Алег Буткевіч, гэта не проста чарговая сакральная пабудова каталіцкай канфесіі, а архітэктурная славутасць, якая ўпрыгожыць гістарычны цэнтр горада.
Прамая трансляцыя каляднай службы, якую ўзначаліць біскуп, сёлета будзе весціся з касцёла Святога Андрэя Баболі ў Полацку.
– Такім чынам мы хочам падкрэсліць значнасць горада, які адзначыў 500-годдзе перакладу Бібліі на беларускую мову, які зрабіў наш зямляк ураджэнец Полацка Францыск Скарына, – адзначыў біскуп.
Галоўнай жа падзеяй 2018-га ён назваў візіт беларускіх біскупаў у Ватыкан і сустрэчу з Папам Рымскім Францыскам. Гэта будзе свайго роду справаздача аб дзейнасці каталіцкай царквы ў Беларусі, папярэдняя была ў 2009 годзе.
Пантыфік, як адзначыў Алег Буткевіч, ведае пра нашу краіну, і падчас сустрэчы, якая пройдзе ў пачатку студзеня, будзе разгледжанае пытанне аб візіце папы ў Беларусь.
Цяпер актыўна ідзе падрыхтоўка да свята Нараджэння Хрыстова. У прыватнасці, у Мастацкім музеі Віцебска адкрылася выстава дзіцячай творчасці, якая традыцыйна праходзіць пад патранатам касцёла, адбудуцца конкурсы батлейкі, каляднай песні.
Асаблівай увагай агорнуты самотныя людзі, інваліды і, вядома, дзеці. Валанцёры наведваюць дамы састарэлых, сацыяльныя прытулкі, шматдзетныя сем'і. Кожны дом, кожнае сэрца, як падкрэсліў кіраўнік каталіцкай епархіі, у гэты час напаўняецца згодай, радасцю і любоўю.