Бізнэс-інкубатары створаць у Баранавічах і Глыбокім у межах праекта ПРААН
З лютага 2017 года Праграма развіцця ААН і Міністэрства эканомікі Рэспублікі Беларусь пры фінансавай падтрымцы Расійскай Федэрацыі рэалізуюць дадзены праект.
— Дамагчыся пазначанай мэты — садзейнічаць занятасці насельніцтва — мы хочам праз стымуляванне прадпрымальніцкай ініцыятывы ў сферы малога і сярэдняга бізнесу, а таксама за кошт фарміравання розных форм вытворчай кааперацыі і знешнеэканамічнай інтэграцыі ў рамках ЕАЭС, — паведаміла кіраўнік праекта Марына Каліноўская. — Наш бюджэт — адзін мільён долараў, які размяркоўваецца па трох напрамках: адукацыя бізнес-інкубатары, правядзенне навучальных мерапрыемстваў, развіццё субкантрактацыі і франчайзінгу. Асноўныя партнёры праекта — Дэпартамент па прадпрымальніцтве Мінэканомікі, Беларускі фонд фінансавай падтрымкі прадпрымальнікаў, ААТ «Банк развіцця Рэспублікі Беларусь».
Для апрабацыі эфектыўных падыходаў у развіцці малых прадпрыемстваў у пяці пілотных гарадах Віцебскай і Магілёўскай абласцей (Барань, Глыбокае, Крычаў, Мсціслаў, Чавусы) будуць створаны бізнес-інкубатары.
— Гэтыя пляцоўкі стануць для пачаткоўца прадпрымальніка інфармацыйным акном. Тут ён зможа атрымаць адказы на любое пытанне, якое яго цікавіць, — падкрэсліла Марына Каліноўская. — За дадатковымі ведамі можна адправіцца і на бясплатныя навучальныя мерапрыемствы, якія ўжо праводзяцца ў гарадах Віцебскай вобласці. У першым паўгоддзі каля 10 семінараў прайшлі ў Ліёзне, Гарадку, Лепелі, Браславе, Полацку. Спікерамі выступілі дасведчаныя кансультанты і эксперты, якія далі парады тым, хто задумваецца аб адкрыцці ўласнай справы.
На трэнінгі прыходзяць і дзеючыя прадпрымальнікі, якія жадаюць, напрыклад, ведаць, як правільна прасоўваць свой бізнес. Адказ на гэтае пытанне змаглі атрымаць удзельнікі семінара «Інструменты маркетынгу для малога бізнесу», які нядаўна адбыўся ў Віцебску. Яго вядучыя — старшыня праўлення грамадскага аб'яднання падтрымкі бізнесу і прадпрымальніцтва «Садзейнічанне і развіццё» Максім Лявоненкаў і SEO-спецыяліст Андрэй Радзiевiч — распавялі аб павелічэнні продажаў за кошт старанна спланаванай маркетынгавай кампаніі і пісьменнай рэкламы ў інтэрнэце.
У межах праекта ПРААН малыя і сярэднія прадпрыемствы актыўна ўцягнуты ў кааперацыйныя працэсы праз пашырэнне магчымасцей аўтсорсінгу, субкантрактацыі, франчайзінгу, распавяла эксперт. Для гэтых мэт будзе створана нацыянальная сістэма субкантрактацыі і забяспечана яе інтэграцыя з Расійскай Федэрацыяй і іншымі краінамі ЕАЭС. У Віцебску біржа кантактаў адбылася 16 ліпеня ў межах Міжнароднай бізнес-канферэнцыі «Інавацыі — шлях да паспяховай інтэграцыі».
Для тых, хто жадае пашырыць свае эканамічныя магчымасці праз франчайзінг, 16 кастрычніка ў Мінску адбудзецца вялікая выстава франшыз, дзе будуць прадстаўлены рэальныя гісторыі поспеху. З асновамі такога віду рынкавых адносін можна азнаёміцца з дапамогай электроннага дапаможніка, размешчанага на сайце праекта.
ПРААН загадзя паклапацілася і пра фінансавы складнік стартапаў, якія дзякуючы Беларускаму фонду падтрымкі прадпрымальніцтва і Банку развіцця Рэспублікі Беларусь сёння могуць атрымаць крэдытную падтрымку на выгадных умовах.
— Функцыя праекта — пасрэдніцтва — выконваецца на 100%, — у заключэнне адзначыла Марына Каліноўская. — Ён зводзіць патэнцыйныя магчымасці малых гарадоў з інтарэсамі буйнога бізнесу і замежных інвестараў, спрыяе ўзаемадзеянню прадпрыемстваў, прадпрымальнікаў з органамі мясцовай улады і грамадскімі структурамі.