Бюджэт Віцебскай вобласці на 2016 год запланаваны з прафіцытам Br156 млрд
Агульная сума даходнай часткі бюджэту з улікам уласных даходаў і бязвыплатных паступленняў плануецца на ўзроўні Br17 трлн 432 млрд. Выдаткі складуць Br17 трлн 276 млрд (рост да чаканых выдаткаў 2015 года на 15%). Пры гэтым бюджэт захавае сацыяльную накіраванасць - прыярытэтамі бюджэтнага фінансавання з'яўляюцца накіраванне сродкаў на ўтрыманне і развіццё сацыяльнай сферы і аказанне фінансавай падтрымкі асобным сацыяльна важным галінам эканомікі і катэгорыям грамадзян. Сацыяльныя артыкулы складуць 63% расходнай часткі бюджэту (Br11 трлн 224 млрд).
Суму перавышэння даходаў над расходамі плануецца накіраваць на пагашэнне аблігацый, выпушчаных аблвыканкамам для падтрымкі аграпрамысловага комплексу ў 2011-2015 гадах, а таксама на аказанне дапамогі Пастаўскаму і Аршанскаму райвыканкамам (пагашэнне пазык на фінансаванне рэканструкцыі Пастаўскага і Арэхаўскага льнозаводаў), на пагашэнне бюджэтных крэдытаў, набыццё тэхнікі прадпрыемства "Гомсельмаш", на аднаўленне свінаводчых комплексаў.
Устойлівага фарміравання даходнай базы бюджэту плануецца дасягнуць у тым ліку за кошт працягу рэалізацыі рэгіянальнай праграмы інавацыйнага і інвестыцыйнага развіцця. У вобласці плануецца стварыць не менш за 130 новых прадпрыемстваў і вытворчасцей. На рэалізацыю высокатэхналагічных праектаў будуць накіраваны сродкі інавацыйнага фонду аблвыканкама ў суме Br50 млрд. А таксама на ўмовах сафінансавання рэсурсы рэспубліканскага інавацыйнага фонду. "Гэта дазволіць надаць дадатковы імпульс развіццю эканомікі вобласці, павялічыць падатковы патэнцыял", - сказаў дакладчык і абазначыў два інавацыйныя праекты, якія, на яго думку, прынясуць важкі рост даходаў. "У Міёрскім раёне комплекс па падгадоўлі лічынкі вугра і яго круглагадовага вырошчвання па тэхналогіі, якая раней у Беларусі не выкарыстоўвалася, а таксама будаўніцтва ў Бешанковіцкім раёне кролікаводчага комплексу магутнасцю 500 т мяса ў год", - канстатаваў Барыс Кічаноўскі.
У бюджэце вобласці на 2016 год прадугледжаны рэсурсы для падрыхтоўкі аб'ектаў да правядзення абласнога свята працаўнікоў вёскі "Дажынкі" ў Сенна. На гэтыя мэты плануецца накіраваць каля Br150 млрд. "Павелічэнне аб'ёму фінансавання свята магчыма за кошт прыцягнення дадатковых рэсурсаў, у тым ліку правядзення суботнікаў і прыцягнення бязвыплатнай дапамогі", - адзначыў Барыс Кічаноўскі.
Алена Ціханава, БЕЛТА.