Спрыяльнае надвор’е для ўборкі ўраджаю актывізавала палявыя работы на Віцебшчыне.

Спрыяльнае надвор'е для ўборкі хлебаў актывізавала палявыя работы ва ўсіх раёнах вобласці. Па аператыўнай інфармацыі на 3 жніўня, на Віцебшчыне ўбрана збожжавых і зернебабовых культур з плошчы 49,9 тысячы гектараў (12,8 працэнта да плана). Намалочана 157,8 тысячы тон збожжа. Сярэдняя ўраджайнасць — 31,6 цэнтнера з гектара.

Па аператыўнай інфармацыі на 3 жніўня, на Віцебшчыне ўбрана збожжавых і зернебабовых культур з плошчы 49,9 тысячы гектараў (12,8 працэнта да плана). Намалочана 157,8 тысячы тон збожжа. Сярэдняя ўраджайнасць — 31,6 цэнтнера з гектара.

У прафесійных спаборніцтвах лідзіруюць маладыя хлебаробы Сенненшчыны. Сярод моладзевых экіпажаў вобласці лепшы вынік у камбайнера Сяргея Сухвала і яго памочніка Дзяніса Астаповіча (на здымку). Працаўнікі ААТ «Сенненскі райаграсэрвіс» на камбайне КЗС-1218 убралі 142 гектары збожжавых і намалацілі 670 тон збожжа. Сяргей і Дзяніс на жніве — не пачаткоўцы. Летась сталі першымі тысячнікамі раёна. І ў гэту ўборачную не збіраюцца здаваць перадавых пазіцый. Іх калега Аляксандр Сухвал, які працуе на адвозцы збожжа, таксама стаў лідарам спаборніцтва сярод вадзіцеляў ва ўзросце да 31 года. На аўтамабілі МАЗ-6501А8 адправіў у хлебныя засекі гаспадаркі 1219 тон збожжа.

Моладзевы экіпаж Антона Дайлідзёнка і Сяргея Зубарава з ААТ «Іванскі-Агра» Чашніцкага раёна, працу якіх таксама адзначыў абласны камітэт прафсаюза работнікаў АПК, нязначна апярэдзіў сенненцаў па ўбранай плошчы, аднак саступіў па намалоце. Іх вынік — 511 тон. Лідэрства з ім сярод моладзі падзяліў вадзіцель таксама «Іванскага-Агра» Мікалай Вятаха, які перавез 937 тон збожжа.

Сярод герояў жніва старэйшыя за 31 год лідарства трымае экіпаж Анатоля і Андрэя Маршалавых з ААТ «Маяк Высокае» Аршанскага раёна. На камбайне КЗС-1218 убралі 166 гектараў і намалацілі 590 тон збожжа. На адвозцы лепшы вынік у Аляксандра Бацяна (ААТ «Якубава-Агра» Дубровенскага раёна), які на аўтамабілі МАЗ-555 перавез 1279 тон збожжа. Лепшыя вытворчыя паказчыкі на сушыльных агрэгатах у машыністаў Івана Ісачанкі і Віктара Гарбача з ААТ «Агракамбінат «Юбілейны» Аршанскага раёна. На агрэгаце КЗСВ-30Г-Р яны высушылі 3500 тон збожжа.

Самая ўраджайная гаспадарка ў вобласці — ААТ «Якубава-Агра» Дубровенскага раёна, дзе атрымліваюць 64,9 цэнтнера збожжа на круг.

Андрэй ЗАХАРОВ, «Віцьбічы». Фота Аляксандра ЛАЗЮКА, «Голас Сенненшчыны».