Баевікі ўнутраных войскаў прадэманстравалі навыкі ў цэнтры Віцебска з нагоды прафесійнага свята
На плошчы Перамогі адбыўся ўрачысты мітынг, прысвечаны 100-годдзю з Дня ўтварэння воінскага фарміравання, у якім удзельнічалі прадстаўнікі абласной і гарадской улад, грамадскіх арганізацый і праваахоўнікі.
— Унутраныя войскі — адна з найважнейшых частак праваахоўнай сістэмы беларускай дзяржавы, — сказаў камандзір брыгады палкоўнік Аляксей Кулік. — У нас ёсць усё неабходнае для выканання службова-баявых задач — вопыт, майстэрства і імкненне да канца заставацца вернымі прысязе.
Пасля афіцыйнай часткі былі арганізаваны паказальныя выступленні спецыялістаў-кінолагаў са службовымі сабакамі па пошуку наркатычных сродкаў, затрыманні збеглых злачынцаў. Захапленне ў гледачоў выклікала выступленне хлопцаў з 4-й патрульнай роты вайсковай часці 5524 унутраных войскаў МУС, якія майстэрску валодаюць прыёмамі рукапашнага бою. Таксама на плошчы можна было ўбачыць узоры спецыяльнай тэхнікі і ўзбраення і паспрабаваць салдацкую кашу.
Далей асабовы склад злучэння і госці мерапрыемства адправіліся ў Нацыянальны драматычны тэатр імя Я. Коласа. Там прайшла цырымонія ўзнагароджання лепшых вайскоўцаў. Адметным уручылі чарговыя воінскія званні, нагрудныя знакі, граматы і падзякі ад імя МУС, аблвыканкама і камандавання УВ. З святам прадстаўнікоў міліцэйскай брыгады павіншаваў старшыня абласнога Савета дэпутатаў Уладзімір Церанцьеў.
— У сувязі са спецыфікай выконваемых задач вашаму воінскаму фарміраванню даводзілася знаходзіцца на баявым пасту не толькі ў ваенны, але і ў мірны час на працягу ўсяго перыяду свайго існавання, — адзначыў Уладзімір Уладзіміравіч. — Сёння вы з'яўляецеся надзейным аплотам спакою і міру ў Беларусі, дэманструеце высокі прафесіяналізм і самааддачу.