БААА падключылася да рэалізацыі міжнароднага праекта па прафілактыцы пандэміі грыпу A/H1N1

9 лістапада, Віцебск /Сяргей Кочатаў - БЕЛТА/. Беларускае таварыства Чырвонага Крыжа (БТЧК) падключылася да рэалізацыі праекта Міжнароднай федэрацыі Чырвонага Крыжа па прафілактыцы пандэміі грыпу A/H1N1, паведаміў сёння журналістам Генеральны сакратар БТЧК Віктар Колбанаў. У Віцебску ён суправаджае дэлегацыю прадстаўнікоў Міжнароднай федэрацыі Чырвонага Крыжа (МФЧК) на чале з кіраўніком маскоўскага рэгіянальнага прадстаўніцтва МФЧК Яапам Тымерам, якая знаёміцца з дзейнасцю абласной арганізацыі БТЧК, перадае карэспандэнт БЕЛТА. Як адзначыў генеральны сакратар, праект "Ваша лепшая абарона - гэта вы" разлічаны на 2 гады. У ходзе яго рэалізацыі запланавана правядзенне трэнінгаў па навучанні насельніцтва прафілактычным мерам абароны ад інфікавання вірусам A/H1N1, будзе выдадзена вялікая колькасць інфармацыйных матэрыялаў пры падтрымцы міжнародных структур. Акрамя таго, у рамках праекта плануецца сумесна з Міністэрствам аховы здароўя, органамі выканаўчай улады і грамадскімі арганізацыямі адпрацаваць сістэму рэагавання на выклікі, якія ўзнікаюць, падобныя сітуацыі з грыпам A/H1N1. Апошнім часам МФЧК значна актывізавала супрацоўніцтва з БТЧК, перавёўшы свой рэгіянальны офіс з Кіева ў Мінск, а таксама павысілася актыўнасць донараў і нацыянальных таварыстваў гэтай арганізацыі іншых краін пры ўзаемадзеянні з беларускім Чырвоным Крыжам. Так, пры падтрымцы французскага таварыства Чырвонага Крыжа ў Беларусі пачалося навучанне насельніцтва аказанню першай дапамогі па міжнародных стандартах з выдачай адпаведнага сертыфіката міжнароднага ўзору. Атрымаў фінансавую падтрымку праект БТЧК па пераадоленні наступстваў аварыі на Чарнобыльскай АЭС, звязаны з працай трох перасоўных дыягнастычных лабараторый, а таксама праект па стварэнні атрадаў хуткага рэагавання на надзвычайныя сітуацыі. Акрамя таго, ужо Міжнародны камітэт Чырвонага Крыжа прапануе стварыць на базе БТЧК вучэбна-эксперыментальную базу для адпрацоўкі і тыражавання вопыту работы нацыянальнай арганізацыі Чырвонага Крыжа ў іншыя краіны, дадаў Віктар Колбанаў. У ходзе рабочай паездкі кіраўнік маскоўскага прадстаўніцтва МФЧК Яап Тымер пазнаёміўся з практыкай работы абласной арганізацыі БТЧК па рэалізацыі праектаў, якія ажыццяўляюцца пры падтрымцы гэтай міжнароднай арганізацыі, а таксама здзейсніў азнаямленчую паездку ў Сенненскі раён, дзе таксама правёў сустрэчу з мясцовымі актывістамі грамадскай арганізацыі.-0-