Больш за 10 дэлегацый гарадоў-пабрацімаў прыехалі павіншаваць Наваполацк з Днём горада
Мерапрыемствы, прымеркаваныя да Дня горада, стартавалі ўжо 6 чэрвеня, але асноўныя святочныя гулянні сабралі гасцей з Расіі, Украіны, Латвіі, Польшчы і Сербіі (дзе нафтаград мае пабрацімаў), а таксама сяброў з розных куткоў Беларусі менавіта 10 чэрвеня. Сярод іх не толькі афіцыйныя асобы, але і творчыя калектывы, артысты танцавальнага open air на плошчы Будаўнікоў і, вядома, прафесійныя спартсмены, якіх у Наваполацк прывабілі дзве буйныя спартыўныя падзеі.
"Наш горад удастоены гонару правесці першы адкрыты рэспубліканскі турнір па цяжкай атлетыцы памяці С. Лагуна, на які, як чакаецца, прыедуць нават некалькі алімпійскіх чэмпіёнаў. Таксама на адкрытай вадзе - возеры Люхава - ужо праходзяць выступленні традыцыйнага міжнароднага турніру па водналыжным спорце памяці Н. Генава", - адзначылі ў гарвыканкаме.
Стартавалі ўрачыстасці 10 чэрвеня са святочнага шэсця і мітынгу ля гісторыка-мемарыяльнага комплексу "Першая палатка". Па бульвары Л. Новажылава і вул. Кірава ў гэтыя дні працаваў "Горад майстроў", праходзіў адкрыты гарадскі конкурс на лепшае афармленне пляцоўкі майстра. Гарадскі сквер упрыгожыў своеасаблівы вернісаж ад выкладчыкаў і навучэнцаў дзіцячых школ мастацтваў Наваполацка, некаторыя з іх нават правялі майстар-класы па выяўленчым мастацтве. "Дзіцячы гарадок" у скверы каля дзіцячай школы мастацтваў №1 цешыў малых і дзяцей старэйшыя за іх багаццем забаў.
У гарадскім парку культуры і адпачынку ў гэтыя дні таксама было шматлюдна, што недзіўна: атракцыёны, батуты, гульнёвыя пляцоўкі, святочны гандаль, пляцоўка сярэднявечнай культуры – тут было ўсё, каб сям'ёй ці дружнай кампаніяй разам адзначыць Дзень горада.
Кацярына Князева. Фота Аляксандра Хітрова. БЕЛТА.