Больш за 160 пераможцаў рэспубліканскіх і міжнародных алімпіяд па вучэбных прадметах і іх настаўнікаў вобласці ўшанавалі ў Віцебску

У мінулую пятніцу ў абласной філармоніі адбылося ўшанаванне пераможцаў рэспубліканскай алімпіяды па вучэбных прадметах і міжнародных алімпіяд 2013-2014 навучальнага года, а таксама іх настаўнікаў. У агульнай складанасці гэта больш за 160 чалавек, можна сказаць, авангард сістэмы агульнай адукацыі Віцебшчыны. Удзельнікаў урачыстасці прывітаў намеснік старшыні аблвыканкама Уладзімір Церанцьеў.

Вынікі рэспубліканскай алімпіяды сведчаць, што з 91 дыплома больш за ўсё атрымалі юныя знаўцы беларускай мовы і літаратуры (13), інфарматыкі, біялогіі і хіміі, грамадазнаўства і гісторыі – па 11, матэматыкі і геаграфіі – па 9. Па колькасці ўзнагарод лідзіруюць вучні віцебскіх гімназій №№8, 1 і 2. А ў індывідуальным заліку мінулы навучальны год самым паспяховым стаў для дзесяцікласніцы віцебскай гімназіі №1 Барбары Кусковай, якая па інфарматыцы ўдастоена дыплома I ступені на рэспубліканскай алімпіядзе і бронзавага медаля на 26-й міжнароднай алімпіядзе ў Тайвані. Усяго дыпломамі I ступені ўзнагароджаны 11 нашых землякоў. Характэрна, што чацвёра з іх – прадстаўнікі Глыбоччыны: Уладзіслаў Саладкі і Дар'я Кавальчук (абодва з раённай гімназіі, адзначыліся па беларускай мове і літаратуры), Елізавета Дзмітрыева (геаграфія, глыбоцкая СШ №1 ім. П. Сухога) і Алег Русін (грамадазнаўства і гісторыя, Удзелаўскі дзіцячы сад-сярэдняя школа).

Па колькасці ўзнагароджаных вучняў першынство трымаюць настаўніца інфарматыкі віцебскіх гімназій №№1 і 8 Вераніка Паўлаўна Лакціна, настаўніца біялогіі віцебскай гімназіі №1 Ала Аляксееўна Мараліна, настаўнік матэматыкі віцебскай гімназіі №8 Аляксандр Уладзіміравіч Шуголь, настаўнік геаграфіі віцебскай гімназіі №2 Сяргей Мікалаевіч Крывенка, настаўніца фізікі віцебскай гімназіі №7 Алена Аляксандраўна Маруцька і інш.

На цырымоніі былі адзначаны і педагогі, якія паспяхова ўдзельнічалі ў конкурсе «Настаўнік года-2014». Гэта Святлана Усцінаўна Мацулевіч з глубокскай СШ №3 (пачатковыя класы), наваполачане Ірына Баляславаўна Хаданенок (СШ №1, выяўленчае мастацтва), Уладзімір Вячаслававіч Цымановіч (базавая школа №10, інфарматыка) і Наталля Фадзееўна Рыкун (гімназія №2, беларуская мова і літаратура), віцябляне Марына Валянцінаўна Юр'ева (гімназія №5, біялогія) і Таццяна Аляксандраўна Канашонак (гімназія №2, англійская мова), а таксама выхавальніца аршанскіх ясляў-сада №44 Ірына Уладзіміраўна Рагавая.

Вучням і вучаніцам, іх таленавітым педагогам разам з кветкамі ўручаны пасведчанні і прэміі Спецыяльнага фонду Прэзідэнта Рэспублікі Беларусь па сацыяльнай падтрымцы адораных вучняў і студэнтаў, а таксама Віцебскага аблвыканкама.

Галіна Шпакоўская, "Віцебскія весці"