Больш за 170 чалавек трапілі ў зону падтаплення ў Віцебскай вобласці за мінулыя суткі

22 сакавіка, Віцебск /Дзіяна Курыло - БЕЛТА/. Больш за 170 чалавек трапілі ў зону падтаплення ў Віцебскай вобласці за мінулыя суткі, паведаміла карэспандэнту БЕЛТА прэс-сакратар Віцебскага абласнога ўпраўлення МНС Марына Фандо. У сувязі з рэзкім пацяпленнем і дажджом 21 сакавіка пачалося багатае раставанне снегу. У выніку гэтага аказаліся падтопленымі 26 жылых дамоў, 43 скляпенні ў жылых дамах, 59 падворкаў, 58 гаспадарчых пабудоў. Найбольшая колькасць выклікаў была зафіксавана ў Віцебску, Паставах, Шаркаўшчыне, Міёрах, Глыбокім і Лепелі. Агульная плошча падтапленняў склала 15 га. Супрацоўнікам МНС, камунальным і іншым службам даводзілася адпампоўваць ваду, прачышчаць ліўневую каналізацыю і сцёкавыя канавы. На ліквідацыі падтапленняў працавалі каля 200 чалавек, у тым ліку амаль паўсотні супрацоўнікаў МНС, было задзейнічана 71 адзінка тэхнікі, з іх 22 машыны МНС.-0-