Больш за 170 моладзевых экіпажаў удзельнічае ва ўборачнай кампаніі ў Віцебскай вобласці

"Як і заўсёды, моладзь рэгіёну актыўна ўключылася ва ўборачную кампанію. У гэты гарачы час тэрытарыяльныя структуры БРСМ сумесна з прафсаюзнымі арганізацыямі, ГА "Белая Русь" і аддзеламі па справах моладзі райвыканкамаў праводзяць спаборніцтвы сярод маладзёжных экіпажаў і маладых кіроўцаў. Іх на ўборцы сёлета задзейнічана 173 і 107 адпаведна. Асабліва масава падключылася моладзь у Браслаўскім раёне: 19 экіпажаў і 17 кіроўцаў. Далей ідуць Верхнядзвінскі (16 экіпажаў і 8 кіроўцаў) і Дубровенскі (15 экіпажаў і 4 кіроўцы)", - распавёў другі сакратар абкама Вячаслаў Хрол.

Ва ўсіх раёнах запланаваны мерапрыемствы па ўшанаванні маладых камбайнёраў і кіроўцаў падчас уборачнай. А на абласным фестывалі-кірмашы працаўнікоў вёскі "Дажынкі-2017" у Дубровне заслужаныя ўзнагароды атрымае лепшая моладзь. Студэнты і школьнікі Віцебскай вобласці таксама ўносяць пасільны ўклад. Хлопцы працуюць у складзе сельскагаспадарчых студэнцкіх атрадаў, займаючыся ўборкай складскіх памяшканняў, сушкай збожжа, праполкай. Нягледзячы на тое, што сельгасатрады ў большасці фарміруюцца ў сярэдзіне жніўня - пачатку верасня, на сённяшні дзень ужо прыступілі да працы 19 атрадаў, у склад якіх уваходзіць 212 чалавек.

Кацярына Князева - БЕЛТА.