Больш за 250 юных эколагаў збяруцца на фестываль "Экалогія - клопат кожнага" у Віцебску

13 красавіка, Віцебск /Сяргей Кочатаў - БЕЛТА/. Больш за 250 навучэнцаў школ і цэнтраў пазашкольнай работы з усіх раёнаў стануць удзельнікамі абласнога экалагічнага фестывалю "Экалогія - клопат кожнага", які пройдзе 14-15 красавіка ў Віцебску. Аб гэтым карэспандэнту БЕЛТА паведамілі ў экалагічным цэнтры абласнога аб'яднання па арганізацыі пазашкольнай работы з дзецьмі і падлеткамі. Асноўнымі мэтамі фестывалю з'яўляюцца фарміраванне ў моладзі адказнасці за стан навакольнага асяроддзя, пашырэнне і прапаганда экалагічных ведаў сярод падрастаючага пакалення, а таксама выхаванне маральнасці і асэнсаванне экалагічных праблем праз тэатральнае мастацтва. У Віцебску збяруцца 25 творчых калектываў вобласці, якія сталі пераможцамі раённых экалагічных форумаў. Фестываль будзе праводзіцца па трох намінацыях. Экатэатры прадставяць гледачам сцэнічныя пастаноўкі на экалагічную тэматыку. Мясцовыя праблемы па ахове прыроды і абароне навакольнага асяроддзя будуць узнімаць у сваіх выступленнях юныя эколагі ў складзе агітбрыгад. А ўдзельнікі фларыстычных тэатраў прадэманструюць распрацаваныя імі калекцыі адзення, у якіх для дэкору выкарыстаны засушаныя і жывыя расліны, а таксама розны прыродны матэрыял. Членам журы трэба будзе ацаніць не толькі якасць раскрыцця тэмы калектывамі і акцёрскае майстэрства юных экалагічных, але і вызначыць лепшыя рэжысёрскія работы, іх музычнае і мастацкае афармленне. Па выніках фестывалю пераможцы і прызёры будуць адзначаны дыпломамі і граматамі. Лепшыя экалагічныя калектывы атрымаюць права прадстаўляць Віцебскую вобласць на рэспубліканскім экалагічным форуме. Арганізатарамі мерапрыемства выступаюць упраўленне адукацыі Віцебскага аблвыканкама і абласное аб'яднанне па арганізацыі пазашкольнай работы з дзецьмі і падлеткамі.-0-