Больш за 300 праектаў прадставілі юныя даследчыкі Віцебскай вобласці на першы конкурс навуковых работ

26 студзеня, Віцебск /Сяргей Кочатаў - БЕЛТА/. Больш за 300 работ прадставілі юныя даследчыкі на конкурс навукова-даследчых праектаў вучняў, які ўпершыню праводзіцца ў Віцебскай вобласці. Аб гэтым карэспандэнту БЕЛТА паведаміў начальнік навукова-даследчага сектара Віцебскага дзяржаўнага ўніверсітэта імя П.Машэрава Аляксандр Дзядзінкін. Конкурс праходзіць па шасці напрамках (руская і беларуская філалогія; гісторыя і грамадазнаўства; рамана-германская філалогія; фізіка, матэматыка і інфарматыка; біялогія; экалогія, геаграфія і хімія). Па выніках завочнага тура экспертная камісія адабрала для ўдзелу ў фінальным этапе інтэлектуальнага спаборніцтва па 15 лепшых, найбольш прапрацаваных праектаў па кожным напрамку. Заключны этап конкурсу пройдзе ў вочнай форме 12 лютага ва ўніверсітэце. Фіналістам трэба будзе правесці 10-хвілінную прэзентацыю сваіх праектаў. Пераможцы атрымаюць права прадстаўляць вобласць на рэспубліканскім конкурсе навукова-даследчых праектаў вучняў. Акрамя таго, прызёры абласнога конкурсу будуць адзначаны каштоўнымі падарункамі, а іх навуковыя кіраўнікі і настаўнікі заахвочаны ўпраўленнем адукацыі аблвыканкама. Конкурс праводзіцца ў адпаведнасці з праграмай узаемадзеяння Віцебскага дзяржуніверсітэта і абласнога інстытута развіцця адукацыі па арганізацыі навукова-даследчай дзейнасці вучняў, якая рэалізуецца ВНУ з 2010 года. Мэтай праграмы з'яўляецца стварэнне дадатковых умоў для раскрыцця творчых здольнасцей школьнікаў, развіццё цікавасці да навукова-даследчай работы. Мерапрыемствы праграмы ўключаюць розныя формы сумеснай работы школьнікаў, педагогаў і метадыстаў ВНУ па навукова-даследчай дзейнасці. Так, у канцы 2010 года ўпершыню ў вобласці адбылася абласная дыстанцыйная алімпіяда па алгебры памяці прафесара Канстанціна Ананчанкі, у якой прынялі ўдзел больш за 500 вучняў 7-9 класаў агульнаадукацыйных школ. У перспектыве гэта мерапрыемства мяркуецца зрабіць традыцыйным і прадугледзець магчымасць удзелу школьнікаў з іншых рэгіёнаў. У лютым плануецца ўпершыню правесці абласны турнір юных фізікаў, а таксама шэраг навукова-метадычных семінараў для выкладчыкаў сярэдніх школ па арганізацыі навукова-даследчай работы ў навучальных установах. Усяго ў вобласці дзейнічаюць больш за 370 навуковых таварыстваў вучняў у школах, у тым ліку звыш 130 з іх арганізаваны на базе пачатковай школы.-0-