Больш за 40 удзельнікаў ад Віцебшчыны адправяцца на фінал WorldSkills Belarus–2018
На рэспубліканскі этап адправяцца 44 удзельнікі. Спецыяльна для віцебскай зборнай Полацкім дзяржаўным хіміка-тэхналагічным каледжам была распрацавана і пашыта форма для ўдзельнікаў конкурсу.
– Сёння існуе сур'ёзная кадравая праблема, недастаткова спецыялістаў, прафесіяналаў. Не будзе развіцця і перспектывы, пакуль мы самі не вырашым гэтае пытанне. WorldSkills – адзін з варыянтаў атрымаць у будучыні высокакласных спецыялістаў. Прысутныя ў гэтай зале даказалі, што менавіта яны лепшыя з лепшых. Уражвае і выстава, якую падрыхтавалі ўстановы адукацыі, прадпрыемствы і арганізацыі Віцебшчыны, – адзначыў падчас урачыстай цырымоніі ўзнагароджання пераможцаў і прызёраў рэгіянальнага этапу конкурсу старшыня Віцебскага аблвыканкама Мікалай Шарснёў.
Мікалай Мікалаевіч выказаў упэўненасць, што самае важнае ў спаборніцтве – гэта павышэнне прэстыжу чалавека працы. Хлопцы сваёй перамогай умацоўваюць не толькі ўласны аўтарытэт, але і статус выбранай прафесіі, сваіх навучальных устаноў і горада. Кіраўнік вобласці пажадаў конкурсантам незабыўных уражанняў і далейшых творчых поспехаў.
За дасягненнямі хлопцаў стаяць бессаромныя ночы, уменне сабрацца і расставіць прыярытэты, прэзентаваць сябе. Пераможцы і прызёры конкурсу адзін за адным падымаліся на сцэну за заслужанымі ўзнагародамі. На іх адрас гучала шмат добрых слоў і віншаванняў.
– Я прайшоў шлях ад слесара да генеральнага дырэктара. Вы ўпэўнена зрабілі крок у кар'еры і даказалі сваё майстэрства. І памятайце, каб стаць добрым дырэктарам, трэба быць добрым слесарам, – сказаў старшыня Віцебскага абласнога саюза наймальнікаў, член аргкамітэта конкурсу Уладзімір Туравінаў.
Конкурс WorldSkills – своеасаблівыя Алімпійскія гульні для маладых спецыялістаў рабочых прафесій. Наша краіна далучылася да міжнароднага руху ў 2014 годзе. Гэта дало магчымасць беларускай моладзі ўдзельнічаць у міжнародных чэмпіянатах прафесійнага майстэрства.
Наперадзе ў нашых землякоў новыя выпрабаванні. Па іх выніках вызначацца вучні, якія будуць прадстаўляць Беларусь на першынстве свету ў 2019 годзе ў Казані. Упэўнены, галоўныя вынікі яшчэ наперадзе. Пажадаем хлопцам удачы!
