Больш за 50 экскурсійных маршрутаў падрыхтавана для гасцей II Еўрапейскіх гульняў

Орыгінал-макет турыстычнай карты з славутасцямі і месцамі правядзення спартыўных мерапрыемстваў II Еўрапейскіх гульняў плануецца распрацаваць у Мінску да 10 мая, паведаміў намеснік старшыні Мінгарвыканкама Арцём Цуран падчас выязнога пасяджэння Міжведамаснага экспертна-каардынацыйнага савета па турызме пры Савеце Міністраў, перадае карэспандэнт БЕЛТА.

Турыстычныя прадпрыемствы горада падрыхтавалі для гасцей шырокі выбар экскурсій - больш за 50 маршрутаў. У перыяд гульняў сталічныя творчыя калектывы прадставяць разнастайную культурна-забаўляльную праграму ў фан-зонах і гістарычным цэнтры. Па словах Арцёма Цурана, на долю Мінска прыпадае 57% экспарту турыстычных паслуг па рэспубліцы.

У 2018 годзе турыстычную дзейнасць у сталіцы ажыццяўлялі 736 арганізацый, для экскурсійнага абслугоўвання атэставана 356 экскурсаводаў і 147 гідаў-перакладчыкаў. Гасцінічная сетка горада прадстаўлена 52 гасцініцамі і пяццю хостэламі. Для пражывання кліенцкіх груп вызначана 31 гасцініца на 5 тыс. нумароў, турыстам і заўзятарам прапануюцца месцы ў 21 гасцініцы.

У сферы грамадскага харчавання працуюць каля 1,6 тыс. кафэ і рэстаранаў. На беларускай нацыянальнай кухні спецыялізуюцца больш за 50 кропак грамадскага харчавання.

"Турыстычны патэнцыял сталіцы прадстаўлены на міжнародных турыстычных выстаўках, інфармацыя аб II Еўрапейскіх гульнях размешчана на станцыях і ў вагонах метро.

Праводзіцца работа па афармленні ў адзіным стылі фан-зон, прылеглых да спартыўных аб'ектаў, укараняецца канцэпцыя гарадской сістэмы прасторавай арыентацыі пешаходаў. Устаноўлена 69 інфармацыйных пунктаў з картамі, славутасцямі сталіцы, месцамі адпачынку", - распавёў Арцём Цуран.