Вялікая прыборка малой радзімы: Дзмітрый Дзямідаў разам з членамі Беларускай партыі «Белая Русь» далучыліся да суботніка

У дзень рэспубліканскага суботніка працоўны дэсант да дома 15, корпус 1 па вуліцы П. Броўкі ў Віцебску ўзначалілі старшыня абласнога Савета дэпутатаў Дзмітрый Дзямідаў і рэктар ВДУ імя П.М. Машэрава Валянціна Багатырова. Яны з’яўляюцца членамі Вышэйшага палітычнага савета Беларускай партыі «Белая Русь» і да іх далучыліся актывісты-аднапартыйцы. Супольна яны навялі парадак па перыметры дома, замянілі і пафарбавалі лаўкі каля пад’ездаў і на дзіцячай пляцоўцы, а таксама пасадзілі дрэвы. Дарэчы, сумах і елкі з закрытай каранёвай сістэмай былі выгадаваны ў Батанічным садзе ВДУ.

— Асноўная задача суботніка - навядзенне парадку, азеляненне, каб нашы гарады і вёскі выглядалі ўтульнымі і апетымі, - падзяліўся меркаваннем Дзмітрый Дзямідаў. - Не менш важна, што сродкі ад суботніка па традыцыі будуць выкарыстаны на падтрыманне святых месцаў і захаванне гістарычнай памяці. У гэтым годзе сродкі накіруюць на добраўпарадкаванне Мемарыяла "Дзецям - ахвярам вайны" у н.п. Чырвоны Бераг і на стварэнне Рэспубліканскага цэнтра патрыятычнага выхавання моладзі на базе Кобрынскага ўмацавання Брэсцкай крэпасці. 30 працэнтаў сродкаў ад суботніка, якія застануцца ў вобласці, мы таксама накіруем на ўтрыманне ў годным выглядзе памятных месцаў.

Валянціна Багатырова патлумачыла, што на гэтым аб'екце працуюць не толькі партыйцы, але і дэпутаты абласнога і гарадскога Саветаў. У іх адрас паступіў запыт выбаршчыкаў, які вырашылі задаволіць разам, у тым ліку дзейныя, неабыякавыя члены і кандыдаты ў члены Беларускай партыі «Белая Русь».
Падчас мерапрыемства па добраўпарадкаванні тэрыторыі яго ініцыятары таксама пагутарылі з жыхарамі дома. Аптымістычным завяршэннем працоўнай акцыі стала выступленне творчай моладзі - студэнтаў ВНУ.

"ВІЦЕБСКІЯ ВЕСТКІ"