Браслаў 29-30 траўня акунецца ў Сярэднявечча

28 мая, Віцебск /Вольга Багачова - БЕЛТА/. Браслаў 29-30 мая акунецца ў сярэднявечча, паведаміла карэспандэнту БЕЛТА начальнік аддзела культуры Браслаўскага райвыканкама Галіна Караткова. У горадзе сёння стартаваў міжнародны фестываль традыцыйнай культуры "Браслаўскія зарніцы". Акрамя шматлікіх гасцей з усіх рэгіёнаў Беларусі, краін Балтыі, Расіі, Украіны, Казахстана і Польшчы яго ўдзельнікамі стануць сярэднявечныя рыцары, іх прыгожыя дамы, барды і рамеснікі, якія ўжо 29 мая разгорнуць на Замкавай гары свой намётавы гарадок. На два дні яны дапамогуць усім гасцям і ўдзельнікам фестывалю пагрузіцца ў казачную містэрыю сярэднявечча пад назвай "Меч Брачыслава". Характэрна, што шырокая тэатралізацыя будзе прысвечана не толькі дэманстрацыі ратных подзвігаў старажытных рыцараў, але і цалкам мірным заняткам. Свае майстэрства на свяце прадэманструюць ткачыхі, ганчары, кавалі, майстры саломапляцення, якія ствараюць свае вырабы па старадаўніх тэхніках. Акрамя таго, усе ахвотныя змогуць здзейсніць невялікі экскурс у гісторыю разам з вучонымі і археолагамі, якія раскажуць пра падзеі мінулага і пакажуць, як праводзяцца археалагічныя раскопкі. Цалкам узнавіць атмасферу сярэднявечча дапамогуць калектывы, якія выконваюць старадаўнюю музыку, а таксама прапановы паспрабаваць стравы, прыгатаваныя па старадаўніх рэцэптах. Міжнародны фестываль традыцыйнай культуры "Браслаўскія зарніцы" прысвечаны 945-годдзю Браслава, 70-годдзю ўтварэння Браслаўскага раёна і 65-годдзю Перамогі ў Вялікай Айчыннай вайне. Арганізатарамі мерапрыемства выступаюць Браслаўскі райвыканкам, упраўленне культуры Віцебскага аблвыканкама.-0-