БРСМ прэзентаваў праект «Кветкі Вялікай Перамогі» ў Кітаі

Рэспубліканскі патрыятычны праект БРСМ «Кветкі Вялікай Перамогі» прэзентаваны ў Кітаі, паведаміла карэспандэнту БЕЛТА каардынатар міжнароднага маладзёжнага супрацоўніцтва ЦК ГА «БРСМ» Алеся Сазанкова.

«У гэтыя дні беларуская маладзёжная дэлегацыя прымае ўдзел у лагеры Шанхайскай арганізацыі супрацоўніцтва (ШАС) у Цындаа. На яго палях была прадстаўлена нацыянальная экспазіцыя, у тым ліку прэзентаваны рэспубліканскі патрыятычны праект «Кветкі Вялікай Перамогі» і яго сімвал — яблыневы цвет з чырвона-зялёнай стужкай. Гэтая маштабная сацыяльная акцыя, накіраваная на яднанне беларусаў, рэалізуецца ў краіне з 2015 года па ініцыятыве нашага саюза і згуртавала за гэтыя гады сотні тысяч жыхароў Беларусі розных узростаў і прафесій. У гэтым годзе «Кветкі Вялікай Перамогі» сталі састаўной часткай шматступеньчатага рэспубліканскага патрыятычнага праекта БРСМ і БРПА «Беларусь памятае». Некалькімі тыднямі раней гэты праект быў прэзентаваны ў Лондане ў рамках праграмы Тыдня беларускага мастацтва ў Вялікабрытаніі — Belarusian Art in UK», — расказала Алеся Сазанкова.

Беларускую нацыянальную экспазіцыю наведала дырэктар Кітайскага маладзёжнага цэнтра міжнародных абменаў Ма Сінмінь. «У выніку стасункаў дасягнуты дамоўленасці аб умацаванні міжнародных абменаў нашых краін, у тым ліку па лініі IT-супольнасцей», — адзначыла прадстаўніца БРСМ.

Чацвёрты маладзёжны лагер ШАС адкрыўся 26 красавіка. З 2016 года і на пяцігадовую перспектыву Усекітайская федэрацыя моладзі штогод запрашае па 200 прадстаўнікоў моладзі з краін ШАС з мэтай развіцця сяброўскіх адносін, садзейнічання міжнародным абменам і супрацоўніцтва маладзёжных арганізацый Еўразійскага рэгіёну. Сярод запрошаных краіны — удзельніцы ШАС: Індыя, Казахстан, Кітай, Кыргызстан, Пакістан, Расія, Таджыкістан, Узбекістан і краіны — назіральнікі: Афганістан, Беларусь, Іран, Манголія.

Тэматыка цяперашняга лагера — «Новы шанец. Новая будучыня».

Праграма лагера ўключае азнаямленне з інавацыйнымі праектамі краін — удзельніц Маладзёжнага савета ШАС. На яго палях запланаваны перамовы аб супрацоўніцтве з адукацыйнымі ўстановамі, цэнтрамі падтрымкі прадпрымальніцтва, маладымі прадпрымальнікамі, нарада Маладзёжнага савета ШАС, міжнародны форум маладзёжнага прадпрымальніцтва «Да мары на Вялікім Шаўковым шляху», прэзентацыя бізнес-інкубатараў, семінар-прэзентацыя і навучальныя трэнінгі. Адначасова ўдзельнікі будуць мець магчымасць абмеркаваць у межах дзелавога дыялогу з маладзёжнымі партнёрамі ШАС бягучыя праекты і прапрацаваць новыя перспектыўныя напрамкі супрацоўніцтва.

БРСМ і Усекітайская федэрацыя моладзі ў 2011 годзе заключылі пагадненне аб супрацоўніцтве. Прыярытэтамі развіцця ўзаемадзеяння вызначаны: пашырэнне сяброўскіх сувязяў, інфармацыйны абмен у сферы маладзёжнай палітыкі і працы з моладдзю Кітая і Беларусі, абмен дэлегацыямі, рэалізацыя патрыятычных праектаў, лакальных маладзёжных праектаў, развіццё валанцёрскага руху і маладзёжнае прадпрымальніцтва.

БРСМ.