БТР і прылады ваеннага часу з'явяцца ў парку віцебскага музея Героя Савецкага Саюза М. Шмырава

24 чэрвеня, Віцебск /Сяргей Кочатаў - БЕЛТА/. Восем адзінак ваеннай тэхнікі будзе ўстаноўлена ў парку Віцебскага абласнога музея Героя Савецкага Саюза М.Ф. Шмырова, паведаміў карэспандэнту БЕЛТА загадчык сектара па абаронна-мабілізацыйнай рабоце і справах моладзі гарвыканкама Дзяніс Глуткін. З'яўленне ваеннай тэхнікі прадугледжана праектам рэканструкцыі парку, у выніку якой экспазіцыя музея і парку будуць прадстаўляць адзіны мемарыяльны комплекс, прысвечаны партызанскаму руху. Частку ваеннай тэхнікі гораду перадасць на захоўванне Міністэрства абароны. На днях у абласны цэнтр плануецца даставіць БТР-60ПБ узору 1959 года з воінскай часці, якая дыслакуецца ў Слуцку. Акрамя таго, на спецыяльна абсталяваных пляцоўках у паркавай зоне музея Шмырова будуць устаноўлены тры дывізіённыя гарматы "ЗІС-3" калібра 76 мм (узору 1942 года), процітанкавая дывізіённая гармата Д-44 калібра 80 мм (узору 1945 года), таксама перададзеныя ваенным ведамствам. Свой уклад у фарміраванне будучай экспазіцыі пад адкрытым небам зробіць і Віцебскі аэраклуб імя А. Гараўца ДТСААФ, прадаставіўшы шматмэтавы верталёт Мі-2 1961 года выпуску. Яшчэ частка экспанатаў - 100-мм гармата "МТ-12" і мінамёт калібра 120 мм - ужо захоўваюцца на пляцоўцы каля музея Шмырова. Праект рэканструкцыі парку прадугледжвае таксама арганізацыю спартыўных пляцовак. Беларуская федэрацыя футбола перадала гораду сучаснае штучнае пакрыццё для футбольнага поля, таксама ў парку з'явіцца баскетбольная пляцоўка, дадаў Дзяніс Глуткін. Вядуцца работы па развіцці сэрвіснай інфраструктуры паркавага комплексу, каб зрабіць адзін з цэнтральных паркаў горада любімым месцам сямейнага адпачынку. Часткова абноўлены парк і музейны комплекс змогуць наведаць жыхары Віцебска і госці горада ўжо ў дні святкавання 65-годдзя вызвалення Беларусі.-0-