Прыватны бізнес яшчэ не заняў сваю нішу ў вытворчасці і сферы бытавых паслуг Віцебска - гарвыканкам

Прыватны бізнес яшчэ не заняў сваю нішу ў вытворчасці і сферы бытавых паслуг. Такое меркаванне сёння на брыфінгу ў сувязі з прызнаннем Віцебска лепшым абласным цэнтрам Беларусі для вядзення бізнесу выказала намеснік старшыні Віцебскага гарвыканкама Зінаіда Каралёва, перадае карэспандэнт БЕЛТА.

"Малы і сярэдні бізнес не да канца рэалізуе патэнцыйныя магчымасці па арганізацыі вытворчасцей, асабліва па выпуску імпартазамяшчальнай і экспартаарыентаванай прадукцыі. Не занята прыватнікамі і ніша ў сферы аказання бытавых паслуг. Гаворка ідзе пра рамонт аўтатранспарту, жылля, швейных вырабаў. Дэфіцыт такога роду паслуг асабліва адчувальны ў новых мікрараёнах", - адзначыла намеснік старшыні гарвыканкама. Яна дадала, што прыватнаму бізнесу неабходна больш актыўна ўдзельнічаць у долевым будаўніцтве жылля, каб арганізоўваць на першых паверхах шматкватэрных дамоў майстэрні па аказанні рамонтных паслуг.

Разам з тым Зінаіда Каралёва падкрэсліла, што малы і сярэдні бізнес уносяць значны ўклад у сацыяльна-эканамічнае развіццё Віцебска. У цяперашні час у недзяржаўным сектары эканомікі горада дзейнічаюць 14,9 тыс. суб'ектаў гаспадарання, з іх 10,7 тыс. індывідуальных прадпрымальнікаў, 3,7 тыс. малых прадпрыемстваў і 481 рамеснік. Усяго ў гэтым сектары эканомікі заняты больш за 41 тыс. чалавек, што складае 17,8% эканамічна актыўнага насельніцтва. У агульным аб'ёме падатковых паступленняў у бюджэт горада за студзень-май бягучага года доля малога бізнесу і індывідуальных прадпрымальнікаў склала больш за 26%.