Чым жывеш, моладзь? Віктар Глушын распавёў пра праекты для моладзі на Віцебшчыне
– Віктар Валер’евіч, ці складана працаваць з сучаснай моладдзю?
– Шчыра кажучы, ніколі не разглядаў дадзенае пытанне з такога ракурсу. Думаю, складанай можа быць любая праца, калі яна не прыносіць задавальнення. З моладдзю працаваць цікава – ты адчуваеш зацікаўленасць рабят, знаёмішся з таленавітымі людзьмі, бачыш пэўныя вынікі. Усё гэта надае сілы і энергіі для далейшых здзяйсненняў.
І, вядома, вельмі дапамагае тое, што наша праца – камандная. У адзіночку самы выбітны чалавек не можа зрабіць шмат чаго, менавіта таму адзін з дэвізаў нашай арганізацыі – «Мы – каманда, Саюз моладзі».
– А як быць з тымі маладымі людзьмі, якія літаральна не вылазяць з інтэрнэту?
– Сёння інтэрнэт стаў неад’емнай часткай жыцця не толькі моладзі, але і ўсяго грамадства. І гэта абсалютна нармальна. Сапраўды гэтак жа ў свой час з’явіліся кінематограф і тэлебачанне, была маса размоў аб немінучым знікненні кніг і тэатра, але гэтыя асцярогі не апраўдаліся. Так і зараз нельга казаць пра татальнае зрушэнне сферы інтарэсаў моладзі ў віртуальную рэчаіснасць.
Практычна ў кожнага маладога чалавека ёсць свае захапленні і ў рэальным жыцці: спорт і мастацтва, валанцёрская і навуковая дзейнасць, праца ў студэнцкіх атрадах і многае іншае. А інтэрнэт з’яўляецца цудоўным сродкам перадачы інфармацыі, дапамагае працаваць з моладдзю.
Менавіта таму групы абласной і тэрытарыяльных арганізацый БРСМ ёсць ва ўсіх папулярных сацыяльных сетках. Мы распавядаем пра свае мерапрыемствы і напрамкі дзейнасці, і кожны можа выбраць тое, што яму па душы.
– Віцебская абласная арганізацыя БРСМ сёння – гэта…
– Гэта амаль 60 тысяч таленавітых і амбіцыйных маладых людзей, якія ставяць перад сабой высокія задачы, а галоўнае – выконваюць іх. Абласная арганізацыя традыцыйна прызнаецца адной з лепшых у Беларусі, нашы актывісты перамагаюць на рэспубліканскіх і міжнародных конкурсах.
– Адным з самых вядомых праектаў БРСМ смела можна назваць «100 ідэй для Беларусі». Якім будзе яго працяг?
– У снежні 2017 года адбыўся абласны этап конкурсу «100 ідэй для Беларусі», па выніках якога былі вызначаны аўтары праектаў, што атрымалі права прадставіць Віцебшчыну ў фінале.
Да паездкі ў Мінск у рабят яшчэ ёсць магчымасць унесці карэктывы ў прэзентацыі праектаў, ухіліць недахопы, на якія ўказала экспертная камісія. А шансы трапіць у лік пераможцаў сёлета ўзраслі: колькасць намінацый павялічана ўдвая – з дзесяці да дваццаці.
Дадатковым стымулам стане магчымасць заявіць пра сябе на міжнародным маладзёжным конкурсе дзяржаў – удзельніц СНД «100 ідэй для СНД – 2018», куды будуць запрошаны пераможцы фінальнага этапу.
– Што новага было прыўнесена ў працу ў 2017 годзе?
– Арганізацыя не стаіць на месцы – гэта праяўляецца ва ўсіх напрамках дзейнасці. Рухавіком зменаў з'яўляецца сама моладзь, якая прапануе новыя мерапрыемствы і праекты.
Мабыць, самым знакавым для нас можна лічыць з'яўленне маладзёжнага білета члена БРСМ новага ўзору, які не проста пацвярджае членства ў Саюзе моладзі, але, па сутнасці, аказвае рэальную сацыяльную падтрымку, бо яго ўладальнік аўтаматычна становіцца ўдзельнікам дысконтнай праграмы кампаніі Autоhelp.
Варта адзначыць таксама новы праект БРСМ «Беларусь – крыніца натхнення», які атрымаў шырокую падтрымку ў моладзі. Пра гэта сведчаць і непадробная цікавасць да мерапрыемстваў «Дня вышыванкі», і колькасць работ у рамках конкурсу «Мая Беларусь. Мая будучыня», які праходзіць у гэтыя дні.
– Адным з ключавых напрамкаў дзейнасць БРСМ з'яўляецца летняе працаўладкаванне моладзі. Як у гэтым годзе вы плануеце гэту працу?
– Механізм дакладна прапісаны і неаднаразова апрабаваны, таму значных змен у парадку арганізацыі дзейнасці студэнцкіх атрадаў, думаю, не будзе. Ужо зараз вядзецца падбор аб'ектаў, на якіх змогуць працаваць студатрадаўцы, актуалізуюцца саставы штабаў працоўных спраў.
Мы ставім перад сабой задачы па павелічэнні колькасці працаўладкаванай моладзі за мяжой у складзе сэрвісных, будаўнічых і педагагічных атрадаў. Спадзяемся, што і на тэрыторыі Беларусі ўдасца не толькі працягнуць супрацоўніцтва з нашымі пастаяннымі наймальнікамі, але і знайсці новыя працоўныя месцы.
– Якую галоўную мэту вы ставіце перад арганізацыяй на гэты год?
– Яна прапісана ў нашым статуце і застаецца нязменнай – стварэнне ўмоў для ўсебаковага развіцця моладзі, раскрыцця яе творчага патэнцыялу, садзейнічанне развіццю ў Рэспубліцы Беларусь грамадзянскай супольнасці, заснаванай на патрыятычных і духоўна-маральных каштоўнасцях беларускага народа.
У 2018-м годзе ў краіне пройдуць выбары ў мясцовыя Саветы дэпутатаў, а таксама працягнецца падрыхтоўка да Еўрапейскіх гульняў 2019 года. Упэўнены, моладзь проста не можа застацца ўбаку ад гэтых знакавых падзей.
Таксама мы плануем адзначыць 100-годдзе камсамольскай арганізацыі як неад'емнай часткі гісторыі моладзевага руху Беларусі.
– Супрацоўнічаеце ці вы з моладзевымі арганізацыямі за межамі Рэспублікі Беларусь?
– Так, вядома. Беларуская дэлегацыя прымала ўдзел у фестывалі ў Сочы. Там нам удалося правесці шэраг сустрэч з моладдзю Расіі, В'етнама, Таджыкістана, Туркменістана, Кыргызстана і многіх іншых краін, параўнаць, чым падобныя і чым адрозніваюцца нашы маладыя людзі, абмеркаваць планы на будучыню.
Але найбольш цеснае супрацоўніцтва ў нас склалася з суседзямі – Смаленскай абласной грамадскай арганізацыяй Расійскай Саюза Моладзі і Аўтаномнай некамерцыйнай арганізацыяй «Рады будучыні».
У межах падпісаных пагадненняў у 2017 годзе былі рэалізаваны праекты «Насустрач да зорак» і «Саюзнае братэрства», за што асаблівыя словы падзякі хацелася б выказаць нашым расійскім партнёрам.
– Чаго вы чакаеце ад 2018 года?
– Спадзяюся, што настаўны год будзе яшчэ лепшым за папярэдні. Таму чакаю новых цікавых задач, маладзёжных ініцыятыў, праектаў, перамог і здзяйсненняў. А чытачам хочацца сказаць: верце ў нашу моладзь – ёй многае па плячы!