Чатыры раёны Віцебскай вобласці завяршаюць уборку збожжавых

9 жніўня, Віцебск /Сяргей Кочатаў - БЕЛТА/. Гаспадаркі чатырох раёнаў Віцебскай вобласці завяршаюць уборку збожжавых, паведамілі карэспандэнту БЕЛТА ў камітэце па сельскай гаспадарцы і харчаванні аблвыканкама. Сярод перадавікоў жніва Лёзненскі раён, дзе скашана 96,5% збожжавага кліну. Гаспадаркі раёна намалацілі больш за 34,6 тыс.т збожжа пры сярэдняй ураджайнасці 21,5 ц/га. Калі ўдасца не збавіць тэмп жніва, то на працягу аднаго дня асноўныя работы на палях раёна будуць завершаны, адзначылі спецыялісты. Акрамя таго, у ліку лідараў Аршанскі, Дубровенскі і Сенненскі раёны. Тут засталося ўбраць менш за 10% плошчаў, гаспадаркі здольныя зрабіць гэта на працягу бліжэйшых двух-трох дзён. Па намалоце найбольшы вынік дэманструе Аршанскі раён, які ўшчыльную наблізіўся да мяжы ў 100 тыс.т. Паводле даных на 9 жніўня, у цэлым па вобласці скашана больш за 370 тыс.га, або 82,3%. Намалочана амаль 764 тыс.т збожжа, сярэдняя ўраджайнасць складае 20,6 ц/га. Завяршыць уборку збожжавых і зерневых бабовых плануецца да канца бягучага тыдня, пасля чаго мяркуецца прыступіць да ўборкі кукурузы на сілас. Пад пасевы кукурузы ў рэгіёне занята каля 81 тыс.га.-0-