Чыноўнікі Сенненскага раёна выхоўваюць актыўную жыццёвую пазіцыю асабістым прыкладам

22 сакавіка, Віцебск /Вольга Багачова - БЕЛТА/. Чыноўнікі Сенненскага раёна заняліся выхаваннем актыўнай жыццёвай пазіцыі ў насельніцтва. Пры гэтым па рэкамендацыі вядомага перафразаванага афарызму Махатмы Гандзі "Хочаш змяніць свет - змяніся сам" выпрацоўваць новую якасць характару жыхароў Сенненшчыны яны пачалі з сябе, распавёў карэспандэнту БЕЛТА начальнік аддзела ідэалагічнай работы Сенненскага райвыканкама Сяргей Мяцеліца. Пачынаючы са студзеня гэтага года кіраўнікі розных ведамстваў райвыканкама, праваахоўных органаў і раённага аддзела па надзвычайных сітуацыях штомесяц праводзяць аператыўныя нарады з супрацоўнікамі розных службаў, якія па сваім родзе заняткаў найбольш часта кантактуюць з мясцовымі жыхарамі. У студзені такая сустрэча адбылася з паштальёнамі і дэпутатамі пасялковых саветаў, у лютым - з супрацоўнікамі МНС. 23 сакавіка чыноўнікі сустрэнуцца з медыцынскім персаналам, які выязджае на экстранныя выклікі "103". Галоўнай тэмай такіх мерапрыемстваў становяцца балючыя пытанні, выяўленыя ў насельніцтва: работнікі распавядаюць пра іх чыноўнікам, а тыя фіксуюць іх па сваіх напрамках, каб потым вырашыць. Прычым падчас сустрэч даволі рэгулярна паступаюць трывожныя званкі па нумарах тэлефонаў дзяжурных службаў або адказных асоб адпаведных ведамстваў. "Так, недзе быў заўважаны выпадак сямейнага гвалту, зламаная калонка, аварыйны стан печанай ацяплення. Праблемы, якія здаюцца нязначнымі ў глабальным маштабе, для людзей становяцца часам сапраўднай бядой. Аператыўна вырашыць іх часта перашкаджае пазіцыя неўмяшання або недаверу да мясцовых органаў улады. Новая форма працы дазволіла больш мабільна рэагаваць і вырашаць такія пытанні, стварыць эфектыўную зваротную сувязь", - адзначыў суразмоўца. Активная пазіцыя службовых асоб Сенненшчыны стала лепшым прыкладам для ўсіх мясцовых жыхароў: колькасць званкоў, якія паступілі ад іх на гарачыя лініі РАУС, РАНС, камунальнай службы раёна, за апошнія месяцы значна ўзрасла. "Такое стаўленне да жыцця дазволіць вывесці ўзаемадзеянне людзей і чыноўнікаў на зусім новы ўзровень, а таксама стане штуршком да развіцця раёна", - упэўнены Сяргей Мяцеліца.-0-