Колькасць вакансій у службе занятасці Віцебскай вобласці на пачатак 2011 года ўзрасла ў 1,5 раза

27 студзеня, Віцебск /Дзіяна Курыла - БЕЛТА/. Колькасць вакансій у службе занятасці Віцебскай вобласці на пачатак 2011 года ў параўнанні з пачаткам 2010 года ўзрасла ў 1,5 раза. Пры гэтым колькасць беспрацоўных скарацілася на 17%, паведамілі карэспандэнту БЕЛТА ва ўпраўленні па занятасці насельніцтва камітэта па працы, занятасці і сацыяльнай абароне Віцебскага аблвыканкама. На 1 студзеня бягучага года ў банку даных налічвалася 4,9 тыс. вакансій. Колькасць беспрацоўных склала 5,3 тыс. чалавек. Узровень зарэгістраванага беспрацоўя да эканамічна актыўнага насельніцтва знізіўся з 1,1% да 0,9%. Прадпрыемствы рэгіёна гатовы прыняць на працу маляроў-штукатураў, муляроў, цесляроў, абліцоўшчыкаў-плітачнікаў, машыністаў бульдозера, экскаватара, электрагазазваршчыкаў, рабочых па металаапрацоўцы. Сярод спецыялістаў і служачых пастаянным попытам карыстаюцца галоўныя бухгалтары, інжынеры-канструктары, праекціроўшчыкі, прарабы, медсёстры, урачы. Станоўчыя тэндэнцыі на рынку працы развіваліся шмат у чым дзякуючы прымаемым мерам мэтанакіраванай палітыкі занятасці, замацаваным дзяржаўнай праграмай садзейнічання занятасці. У эканоміцы вобласці наймальнікамі розных форм уласнасці і гаспадарання ў 2010 годзе працаўладкавана на зноў створаныя працоўныя месцы больш за 25 тыс. чалавек.-0-